Nyuma yo gutsinda ingabo za FARDC n’abo bari bafatanyije, abarwanyi b’umutwe wa M23 batangiye ibikorwa byo kugenzura no kurinda umupaka uhuza u Rwanda na Repubulika Iharanira Demokarasi ya Congo (DRC).
Ubu butumwa bushya bwa M23 bwatangajwe nyuma y’imirwano ikaze yabereye mu bice bitandukanye byo mu Burasirazuba bwa Congo, aho uyu mutwe wafashe ibice by’ingenzi harimo n’uturere twegereye umupaka.
Amakuru aturuka mu nzego zitandukanye yemeza ko abarwanyi ba M23 bashyizeho za bariyeri nshya mu rwego rwo kumvikana n’abayobozi mu bice bimwe na bimwe bigize Igihugu cya DRC, aho bakomeje guhura n’udutsiko tw’abasirikare ba FARDC bagerageza gusubira mu duce batakaje.
Abaturage batuye hafi y’uyu mupaka batangaza ko hagiyeho ingamba nshya zo kwirinda umutekano mucye, aho abacuruzi n’abagenzi banyura kuri uyu mupaka babanza gusakwa mu buryo bukomeye.
Umuvugizi wa M23 yatangaje ko intego y’ibi bikorwa ari uguhagarika ibikorwa by’ubushotoranyi no gukumira ko hakomeza kugaba ibitero byambukiranya umupaka. “Turi hano kugira ngo turinde umutekano w’abaturage kandi twirinde ibitero byari bisanzwe biterwa n’abarwanyi ba FDLR n’abandi bafatanyije na FARDC.”
Ku rundi ruhande, Leta ya Congo yakomeje gusaba ubufasha mpuzamahanga mu guhangana n’uyu mutwe, ivuga ko ibikorwa byawo bibangamiye ubusugire bw’Igihugu. Gusa, M23 yo ishimangira ko igamije Uburenganzira n’amahoro mu Burasirazuba bwa Congo.
