Umuvugizi wa Guverinoma y’u Rwanda, Yolande Makolo, yatangaje ko Abanyarwanda 10 muri 15 bajyanywe mu bihugu byo muri Aziya bamaze gutahuka mu gihugu, naho abandi 5 bakiriyo na bo bari mu nzira yo kugaruka, ku bufatanye na guverinoma n’abandi bafatanyabikorwa.
Mu butumwa yanyujije ku rubuga rwa X (rwahoze ari Twitter) asubiza uwari watabarije abo Banyarwanda, Makolo yagize ati: “Leta y’u Rwanda ku bufatanye n’Ishami ry’Umuryango w’Abibumbye ryita ku Bimukira (IOM), mu cyumweru gishize yagaruye mu gihugu abantu 10 bari barajyanywe mu buryo bwa magendu bavuye muri Myanmar. Turabizi ko hari abandi 5 bakihari, kandi turi gukorana n’inzego zibishinzwe ngo nabo babashe kugaruka mu rugo.”
Aba Banyarwanda bajyanywe muri ibyo bihugu bizezwa ko bagiye kubona akazi keza kandi gahenze, ariko bagezeyo basanga ibibazo bihari bitandukanye n’uko babyumvaga.
Benshi barashukwaga n’abantu biyitirira ibigo by’ubucuruzi cyangwa amashyirahamwe y’ubuhinzi n’ubwubatsi, bababwira ko bagiye gukora akazi keza kazabafasha guteza imbere imiryango yabo.
Iyo bagezeyo, basangaga bashyizwe mu kazi kadahwitse, rimwe na rimwe gafitanye isano n’icuruzwa ry’abantu cyangwa bakahatirwa gukora imirimo ivunanye mu nyungu z’abandi bantu.
Leta y’u Rwanda yakomeje gusaba Abanyarwanda kujya bitondera ababasezeranya akazi mu mahanga, cyane cyane abakorera ku mbuga nkoranyambaga cyangwa badatanga amakuru yizewe ku bigo byabo.
Ibigo bitandukanye birimo IOM n’indi miryango mpuzamahanga bifatanya na guverinoma mu gikorwa cyo gufasha abanyarwanda batwawe mu buryo butemewe n’amategeko gutaha no kongera gusubira mu buzima busanzwe.
Ubuyobozi bw’Igihugu bushimira abafatanyabikorwa barimo IOM ku ruhare bagira mu kubungabunga uburenganzira bwa muntu no kurwanya icuruzwa ry’abantu, ndetse burakangurira Abanyarwanda kumenyesha inzego z’umutekano igihe hari amakuru bafite yerekeye abantu bashobora kuba baroherejwe cyangwa bagiye koherezwa mu buryo bunyuranyije n’amategeko.
Iki kibazo kigaragaza uburyo icuruzwa ry’abantu rikomeje kuba ikibazo mpuzamahanga, kandi u Rwanda rugasabwa gukaza ingamba zo kurinda abaturage barwo no gukumira abacuruzi b’abantu bakomeje guhenda abaturarwanda cyane cyane urubyiruko, babizeza ubuzima bwiza mu mahanga ariko bagamije inyungu zabo bwite.
