Nyuma y’uko urubuga rwa TikTok rwahagaritse ibikorwa byarwo muri Leta Zunze Ubumwe za Amerika kuri uyu wa 19 Mutarama 2025, bamwe mu bakoresha imbuga nkoranyambaga bagaragaje akababaro batewe n’ifungwa ryarwo. Ibi babigaragaje mu buryo butandukanye, burimo kwifata amafoto no kwandika ubutumwa bwuzuyemo agahinda, bavuga ko bari “ku kiriyo” cy’urwo rubuga.
Ibikorwa bya TikTok byahagaritswe nyuma y’uko Leta Zunze Ubumwe za Amerika zishinjije uru rubuga kuba rwifashishwa mu gutwara amakuru y’abakoresha bayo, bikozwe na kompanyi ya ByteDance y’Abashinwa.
Ibi byatumye hashyirwa mu bikorwa itegeko ryo kurengera umutekano w’Igihugu, bikurikirwa n’igikorwa cyo guhagarika uru rubuga burundu ku butaka bwa Amerika.
Abakunzi ba TikTok basanzwe bazwiho gukoresha uru rubuga mu buryo bw’imyidagaduro, ubucuruzi, ndetse no kwamamaza ibitekerezo byabo ku mbuga nkoranyambaga, bagaragaje ko bibatunguye cyane kuba badashobora kongera kurukoresha.
Abasanzwe bakorera amafaranga ku rubuga, barimo abahanzi, abanyamideli, n’abandi bafite ibikorwa byo kwamamaza, bavuga ko babuze isoko rinini ry’ibyo bakoraga, kuko Amerika ari kimwe mu bihugu bikoresha cyane TikTok.
Mu buryo budasanzwe, abenshi mu bakoresha uru rubuga basigaye bifata amafoto bambaye imyenda y’irabura, bashyira ubutumwa kuri izindi mbuga nkoranyambaga nka Instagram na Twitter, bavuga ko bababajwe cyane n’ifungwa rya TikTok.
Bamwe bagaragaza ko uru rubuga rwari rwabafashije mu gusakaza ibikorwa byabo cyangwa mu kubaka umubano n’abandi bantu bafite inyungu zihuriyeho.
Iki gikorwa cyo gufunga TikTok cyateje impaka nyinshi mu baturage ba Amerika, aho bamwe bashyigikiye icyemezo cya guverinoma, bavuga ko ari ingenzi mu kurengera umutekano w’Igihugu, mu gihe abandi bakomeje gutanga ibitekerezo binenga iki cyemezo, bavuga ko cyabangamiye uburenganzira bwabo ku ikoranabuhanga no kwisanzura ku mbuga nkoranyambaga.
