Ikipe ya APR FC igiye gukina umukino wa gicuti n’Ikipe y’Igihugu ya Nigeria y’abakinnyi bakina imbere mu gihugu, izwi ku izina rya Nigeria CHAN (Championship of African Nations). Uyu mukino uteganyijwe kuba ku wa 29 Nyakanga 2025, kuri Stade Amahoro iherereye i Remera, ariko nk’uko byemejwe n’inzego zibishinzwe, uzakinwa nta bafana bari muri Sitade kubera impamvu z’umutekano n’imyiteguro y’iri rushanwa.
Uyu ni umukino utegerejwe n’abakunzi ba ruhago mu Rwanda, kuko uzaba ari amahirwe kuri APR FC yo gupima urwego rw’abakinnyi bayo, cyane ko iyi kipe ihora yitabira amarushanwa akomeye mu karere no ku rwego rwa Afurika.
Uyu mukino kandi uje mu gihe Nigeria CHAN iri kwitegura imikino y’igikombe cya Afurika cy’abakina imbere mu bihugu byabo (CHAN 2026), aho ishyaka n’ingufu ari byose.
APR FC, ifite igikundiro mu gihugu, izakina ishaka kwerekana ko igifite ubukaka imbere y’ikipe ikomeye nka Nigeria, imwe mu makipe afite amateka akomeye ku mugabane wa Afurika. Abasesenguzi ba ruhago bavuga ko ari umukino ushobora no gufasha abatoza bombi kubona abakinnyi beza bo gukomeza kubakira ikipe y’ejo hazaza.
Ni umukino kandi utegerejweho kuzana umubano n’ubufatanye hagati y’impande zombi, haba ku rwego rwa siporo no ku rwego mpuzamahanga.
Ku rundi ruhande, abafana bari bategereje kureba uyu mukino imbona nkubone basabye ko wazanwa kuri Televiziyo y’igihugu cyangwa ku mbuga nkoranyambaga za APR FC, kugira ngo batazawucikwa burundu.
Uyu ni umukino uzaba wubakiye ku bucuti, ariko uzakinwa n’umuhate n’ishyaka nk’uko amakipe yombi abimenyereweho.
