Kuri uyu wa Gatatu tariki ya 20 Kanama 2025, abaturage bo mu kagari ka Nyamabuye, Umurenge wa Kagogo mu karere ka Burera, bakomeje kugaragaza impungenge zikomeye kubera itsinda ry’abantu biyise Abajangweli rikomeje kubibasira.
Amakuru yemezwa n’abaturage avuga ko iri tsinda ribategera mu nzira, rikabambura ibintu byabo birimo amafaranga, telefoni ndetse n’ibindi bintu bifite agaciro, bigatuma benshi batakaza umutuzo n’umutekano wabo. Abatuye muri aka gace bavuga ko kugenda nijoro byabaye ikibazo gikomeye, ndetse bamwe batinyuka no kuva mu ngo zabo bagashaka iyo baba berekeje.
Umwe mu baturage utashatse ko amazina ye atangazwa yagize ati: “Iyo baje mu nzira baragufata, bakakwambura byose. Ubu twabuze uko tugenda, twese dufite ubwoba bw’iri tsinda ryitwa Abajangweli.”
Ubuyobozi bwa Polisi y’u Rwanda, ishami rya Burera, bwatangaje ko bwamaze kumenya iki kibazo kandi bugiye kugikurikirana mu buryo bwihuse. Umuvugizi wa Polisi mu Ntara y’Amajyaruguru yavuze ko hashyizweho ingamba zo gukaza irondo ry’umwuga ku baturage no kongera ibikorwa by’iperereza kugira ngo abigize intwali bafatwe.
Bagize ati: “Turasaba abaturage gukomeza kudufasha mu gutanga amakuru ku gihe, kugira ngo dushobore gukumira ibi bikorwa by’urugomo bitari bikwiye mu muryango Nyarwanda.”
Abaturage bo muri Nyamabuye basaba inzego zishinzwe umutekano gubatabarwa vuba, kugira ngo basubirane ituze ryabo ryari risanzwe ribarizwa muri ako gace.
