Kuri uyu wa Gatatu, tariki ya 2 Mata 2025, umutoza wa Real Madrid, Carlo Ancelotti, ari bwitabe urukiko i Madrid aho ashinjwa ibyaha byo kunyereza imisoro.
Ibirego byatanzwe n’abashinjacyaha ba Leta ya Espagne bivuga ko Ancelotti, ukomoka mu Butaliyani, yihishe inyuma y’imisoro ingana na miliyoni 1 y’amayero hagati y’umwaka wa 2014 na 2015.
Urukiko rwashyizeho itariki y’iburanisha ku wa 28 Werurwe, nyuma y’uko dosiye ye igenzurwa n’inzego zishinzwe imisoro.
Abashinjacyaha barasaba ko Ancelotti ahanishwa igifungo kiri hagati y’imyaka ine n’amezi icyenda ku byaha bibiri byo kunyereza imisoro. Bavuga ko yakoresheje amasosiyete akora ibicuruzwa kugira ngo ahishe imisoro yavuye mu mishahara ye n’andi mafaranga yinjije.
Nubwo ibi birego bikomeje gukaza umurego, Ancelotti yahakanye ibyo ashinjwa, avuga ko yatanze imisoro ye uko bikwiye kandi ko yiteguye kwiregura mu rukiko.
Uyu mutoza w’imyaka 65 afite amateka akomeye mu mupira w’amaguru. Ni we mutoza wenyine wegukanye igikombe cya UEFA Champions League inshuro eshanu, eshatu yari kumwe na Real Madrid (2014, 2022, 2023) n’ebyiri ari kumwe na AC Milan (2003, 2007).
Ni na we mutoza rukumbi wegukanye ibikombe bya shampiyona eshanu zitandukanye mu Bwongereza (Chelsea), Espagne (Real Madrid), Ubutaliyani (AC Milan), Ubudage (Bayern Munich) n’Ubufaransa (PSG).
Ancelotti yatangiye gutoza Real Madrid mu 2013 kugeza mu 2015, aza gusubirayo mu 2021. Kuva icyo gihe, yayifashije kwegukana ibikombe bikomeye birimo La Liga, Champions League, Super Cup na Club World Cup.
Iburanisha rye rizakurikirwa cyane, cyane ko Real Madrid iri mu bihe byiza muri shampiyona ya Espagne no muri Champions League. Niba ahamwe n’icyaha, bishobora kugira ingaruka ku kazi ke nk’umutoza ndetse no ku hazaza he muri ruhago.
