Casemiro yatangaje ko vuba aha agiye gutandukana n’ikipe ya Manchester United

Umukinnyi mpuzamahanga w’Umunya-Brésil, Casemiro, yatangaje ko azatandukana na Manchester United nk’umukinnyi wigenga (free agent) mu kwezi kwa Kamena uyu mwaka, inkuru yashenguye imitima ya benshi mu bafana b’iyi kipe ikomeye yo mu Bwongereza. Nubwo hatangiye kuvugwa ku iherezo ry’urugendo rwe muri Old Trafford, Casemiro yagaragaje ko urugendo rwe rutararangira burundu, kuko hakiri byinshi byo kurwanira hamwe n’ikipe.

Casemiro yavuze ko kuva umunsi wa mbere agera muri iyi stade y’amateka ya Old Trafford, yahise yumva urukundo n’ishyaka ridasanzwe by’abafana ba Manchester United. Ati: “Kuva umunsi wa mbere nava mu rwambariro nkajya mu kibuga, numvise ishyaka n’urukundo rwa Old Trafford. Uwo mutima w’urukundo nanjye nahise nkusangira n’abafana b’iyi kipe y’i Manchester.”

Yakomeje ashimangira ko n’ubwo atari igihe cyo gusezera burundu, hari andi mezi ane akomeye asigaye azakoresha yitanga uko ashoboye kose. Ati: “Si igihe cyo kuvuga ngo ni iherezo. Haracyari ibihe byinshi byo kwibuka no guhanga amateka mu mezi ane ari imbere.”

Uyu mukinnyi w’imyaka 32 yavuze ko intego ye nyamukuru ari ugufasha Manchester United gutsinda no kugera ku ntsinzi zifatika, yaba mu mikino ya shampiyona no mu marushanwa atandukanye. Yasoje avuga ko Manchester United atari ikipe yakiniye gusa, ahubwo ari igice cy’ubuzima bwe.

Mu gihe abafana bakomeje kwibaza ku hazaza h’iyi kipe, amagambo ya Casemiro agaragaza ko azasoza urugendo rwe atanze byose, asiga amateka adasibangana muri Old Trafford.