Ikipe ya Chelsea yo mu Bwongereza yongeye guhura n’inkuru itayishimishije, nyuma yo kumva ko umukinnyi Fermin Lopez ari hafi kongera amasezerano mashya muri FC Barcelona, ibintu byahise bisenya icyizere bari bafite cyo kongera kugerageza kumugura muri iyi mpeshyi iri imbere.
Mu mpeshyi ishize, Chelsea yari yagaragaje ubushake bukomeye bwo gushaka uyu mukinnyi ukiri muto, nyuma y’uko yari amaze kugaragaza impano idasanzwe mu kibuga hagati muri Barcelona. Gusa icyo gihe, ibiganiro byarangiye nta mwanzuro ufashwe, bituma iyi kipe yo mu Bwongereza isubira inyuma by’agateganyo. Nubwo byagenze bityo, amakuru yavugaga ko Chelsea itigeze icika intege, ahubwo yari yiteguye kongera kugaruka ifite imbaraga nyinshi muri iyi mpeshyi.
Icyakora, ibintu byafashe indi ntera nyuma y’uko amakuru yizewe atangiye kuvuga ko Fermin Lopez yamaze kumvikana na FC Barcelona ku masezerano mashya y’imyaka itanu. Aya masezerano ateganyijwe gusinywa mu minsi ya vuba, akaba ari ikimenyetso cy’uko ubuyobozi bwa Barcelona bushaka kumwubakiraho ahazaza h’ikipe.
Ku ruhande rwa Barcelona, kongera amasezerano ya Fermin Lopez bifatwa nk’intambwe ikomeye mu kubaka ikipe ifite ahazaza heza, cyane cyane hashingiwe ku kuba uyu mukinnyi ari umwe mu bakiri bato bagaragaje kwitwara neza mu marushanwa atandukanye. Kuri Chelsea ho, ni inkuru ibabaje, kuko bisa n’aho inzozi zo kubona uyu mukinnyi mu mabara yabo zamaze kuba amateka.
