Perezida wa Real Madrid, Florentino Pérez, na Perezida wa FC Barcelone, Joan Laporta, bongeye kwinjira mu ntambara y’amagambo ikomeye, nyuma y’uko hagarutse ibyegeranyo bishingira ku FC Barcelone ko yaba yaratanze ruswa ku wahoze ayobora abasifuzi muri Espagne, José María Enríquez Negreira.
FC Barcelone iri mu iperereza ku byaha bya ruswa bivugwa ko hagati ya 2001 na 2018 yaba yarishyuriye Negreira miliyoni zisaga 8,4 z’amayero, mu rwego rwo kugirirwa akamaro mu mikino, binyuze mu kugenerwa abasifuzi “boroshye” cyangwa imisifurire ibashyigikiye.
Nubwo ibi birego bikomeje kuvugwa cyane mu binyamakuru, Barcelone na Negreira bo bakomeje kubihakana, bavuga ko amafaranga yishyuwe yari mu masezerano yo kugenzura uko ikipe yasifuriwe no gutanga raporo z’ubujyanama, atari ayo kuyigirira akamaro mu kibuga.
Mu Nama y’Inteko Rusange ya Real Madrid yabaye ku Cyumweru, tariki 23 Ugushyingo 2025, Pérez yagaragaje ko ibyo FC Barcelone yakoze ari “igisebo” kandi byiciye isura imisifurire ya Espagne.
Yagize ati: “Birashimangira ko mu myaka 17 ishize FC Barcelone yishyuye arenga miliyoni 8 z’amayero uwahoze ayobora abasifuzi. Nta mpamvu nimwe yari gutuma bishyura umuntu ufite umwanya nk’uwo. Uburyo ikipe yabonaga ibyizere n’umusaruro uhoraho ntibishobora kuba impanuka.”
Yongeyeho ko n’uyu munsi FC Barcelone igishyigikiwe na La Liga, ashingiye ku cyemezo cyo kuyemerera gukina umukino wayo hanze ya Espagne.
Ati: “La Liga imaze kuba iy’amakipe abiri: Barcelone na Villarreal. Javier Tebas yadutegetse kwemera ko bakina i Miami nk’aho turi NFL.”
Ku ruhande rwe, Joan Laporta ibyo ntiyabicrcetse. Yahise asubiza Pérez, amushinja kwigira nk’aho ari we uvugira ukuri kurusha abandi, kandi Real Madrid ifashwa n’abasifuzi kurusha undi muntu uwo ari we wese.
Laporta yagize ati: “Bavuze byinshi bishinja Barça ariko byose bigamije kuyisiga icyasha. Barça ntabwo yigeze igura abasifuzi. Ahubwo abasifuzi bose baba ku ruhande rwa Real Madrid.”
Yatanze n’urugero: “Murebe umukino w’icyumweru gishize: ibitego bibiri bya Real Madrid byavuzweho ko harimo gukoresha ukuboko kwa Bellingham n’ikosa rya Vinicius. Iyo ibyo bitemerwa, Barça yari kuba iri ku mwanya wa mbere.”
Laporta yanavuze ko Real Madrid ikomeje kurangwa n’ishyari ry’ibihe byiza FC Barcelone yagize mu myaka y’amateka yayo.
Yagize ati: “Bafite agahinda k’uko hagati ya 2004 na 2015 Barça yari ikipe nziza ku Isi, ikina umupira usukuye buri wese akawukunda. Ibyo byabababaje kuva icyo gihe.”
Mu mikino y’uyu mwaka, Real Madrid ni yo iyoboye urutonde rwa La Liga n’amanota 32, ikurikirwa na FC Barcelone ifite amanota 31.
