Ikipe ya Arsenal yananiwe kubona amanota atatu ku kibuga cya Brentford, amakipe yombi anganya igitego 1-1 mu mukino wa Shampiyona wabereye kuri Gtech Community Stadium. Iyi ntsinzi yabuze yasize Arsenal igifite amanota ane gusa irusha Manchester City iyikurikiye hafi ku rutonde.
Umutoza Mikel Arteta yakoze impinduka zitandukanye mu bakinnyi babanjemo, ariko igice cya mbere cyarangiye amakipe yombi anganya ubusa ku busa. Brentford yagerageje uburyo bwinshi, gusa umunyezamu David Raya akomeza kuba inkingi ikomeye akuramo imipira ikomeye.
Arsenal yafunguye amazamu ku munota wa 61, igitego cyatsinzwe na Noni Madueke nyuma yo guhabwa umupira mwiza na Piero Hincapie. Icyakora, ibyishimo ntibyatinze kuko Keane Lewis-Potter yahise yishyura ku munota wa 70, atsindishije umutwe nyuma y’umupira wari uvuye kwa Michael Kayode.
Mu minota ya nyuma, Arsenal yagerageje gushaka igitego cy’intsinzi, ariko ishoti rikomeye rya Gabriel Martinelli ryahagaritswe n’umunyezamu wa Brentford, bituma umukino urangira amakipe agabanye amanota.
Kunganya uyu mukino byatumye Arsenal ikomeza gushyirwaho igitutu na Manchester City mu rugamba rwo kwegukana igikombe cya Shampiyona. Arteta yavuze ko ikipe ye ikwiye kwiga kugumana ituze nyuma yo gutsinda, cyane cyane iyo ihanganye n’amakipe akoresha imipira y’imiterekano.
Arsenal izakina na Wigan Athletic mu irushanwa rya FA Cup mbere yo kongera kwibanda kuri Shampiyona, aho izahura na Wolves ishaka kongera icyizere cyo guhatanira igikombe.
