Ikipe ya Manchester City ikomeje guhindura isura mu rwego rwo gushimangira ubushobozi bwayo ku rwego rw’umupira w’amaguru mpuzamahanga. Kugeza ubu, abakinnyi batatu bashya bagiye gushyiramo kashe kumugaragaro amasezerano yabo n’iyi kipe, ndetse harimo n’abandi bavugwa bashobora kwiyongera mu minsi iri imbere.
Abdukodir Khusanov yinjiye muri Manchester City nk’umukinnyi mushya ukina inyuma, aguzwe na miliyoni €40 avuye mu ikipe ya Lens yo mu Bufaransa.
Uyu mukinnyi w’umunya-Uzbekistan arateganya gukora isuzuma ry’ubuzima kuri uyu munsi mbere y’uko amasezerano yemezwa burundu. Khusanov yari amaze igihe ashyirwa mu majwi y’amakipe atandukanye kubera impano ye yo gukina nk’umwe mu bakinnyi bafite imbaraga nyinshi mu bwugarizi.
Vitor Reis, na we ukina inyuma, yinjiye muri City avuye muri Palmeiras yo muri Brésil, aho yaguzwe miliyoni €35. Uyu mukinnyi afite izina rikomeye muri shampiyona y’iwabo kubera uburyo yigaragaje mu myanya y’ubwugarizi.
Ku rundi ruhande, Omar Marmoush, umukinnyi ukomoka muri Misiri, yiteguye gusinyira iyi kipe avuye muri Eintracht Frankfurt ku masezerano y’agaciro ka miliyoni €70. Uyu mukinnyi wo hagati azaba yiyongera mu kibuga hagati, agatanga ubunararibonye n’ubushobozi mu guhuza umukino hagati y’ubwugarizi n’ubusatirizi.
Nubwo abo batatu bagiye gushyirwaho umukono, Manchester City iracyari mu biganiro na Juventus kugira ngo yegukane Andrea Cambiaso, umukinnyi w’inyuma ukomoka mu Butaliyani.
Cambiaso ashobora kuza muri Mutarama cyangwa Nyakanga bitewe n’uburyo ibiganiro bizagenda. Nta kirangiye kuri ubu, ariko ibiganiro birakomeje mu buryo bwimbitse.
Manchester City iri kwerekana ko ishaka gukomeza kuba ku isonga, ikagura abakinnyi bafite ubushobozi bwo gutanga umusaruro mu mikino y’imbere mu gihugu no mu ruhando mpuzamahanga.
