Mukayizeri Djalia uzwi nka Kecapu hamwe na Benimana Ramadhan wamamaye nka Bamenya ni bo begukanye imodoka zatanzwe muri Mashariki Film Festival ku nshuro ya 11, nyuma yo kugira amajwi menshi kurusha abandi bari bahatanye.
Mu cyiciro cy’abagore, Kecapu ni we wegukanye intsinzi nyuma yo gutorwa ku majwi 70,208, akurikirwa na Uwamahoro Antoinette uzwi nka Intare y’ingore wagize 32,317. Amajwi yose yatanzwe mu bagore yari 126,948, ahwanye n’amafaranga 25,389,600 Frw.
Mu cyiciro cy’abagabo, Bamenya ni we waje ku isonga n’amajwi 80,748, naho Aime Valens Tuyisenge (Boss Rukundo) agira 14,320. Amajwi yose y’abagabo yari 120,432, ahwanye na 24,086,400 Frw.
Amajwi yose hamwe yageze ku 247,380, angana n’amafaranga 49,476,000 Frw.
Aba batsinze babiri bombi bagiye guhabwa imodoka ebyiri nshya zo mu bwoko bwa Hyundai Sonata, buri imwe ifite agaciro ka miliyoni 13 Frw, bivuze ko zose hamwe zifite agaciro ka miliyoni 26 Frw.
Mashariki Film Festival yatangiye ku wa 22 Ugushyingo 2025, ikazasozwa ku wa 29 Ugushyingo 2025 muri Serena Hotel, aho ibi bihembo bikomeye biteganyijwe gutangirwa ku mugaragaro.
