Umwe mu batunganya umuziki bamenyerewe mu Rwanda, Li John, yatangaje ko afite indirimbo nyinshi yakoranye na nyakwigendera Jay Polly, ariko ko atiteguye kuziha Fifi, umugore babyaranye, ahubwo yifuza ko zashikirizwa umuryango mugari wa nyakwigendera, igihe bazaba bamufasheho umwanzuro w’icyo bashaka kuzikoraho.
Ibi yabitangaje mu kiganiro yagiranye na InyaRwanda, aho yagaragaje uburyo yakoranye bya hafi na Jay Polly, by’umwihariko nyuma y’uko afunguwe. Icyo gihe ngo Jay Polly yari yihaye intego nshya yo kongera kuzamura umuziki we, maze afatanya na Li John mu gutunganya indirimbo zari zigize album nshya.
“Twagiranye ibihe byiza, yakundaga uburyo nakoragamo… Nyuma yo kuva muri gereza, yansanze turakorana indirimbo nyinshi. Hari izo twarangije, n’izindi twari dukiri gukora. Zari kuba album ye,” — Li John.
Uyu mu producer wubashywe mu ruhando rw’umuziki nyarwanda yakomeje avuga ko nubwo abitse izi ndirimbo, atigeze azishyikiriza Fifi, umugore babyaranye, bitewe n’uko adashaka ko bikorwaho n’umuntu ku giti cye.
“Ntabwo nigeze muha Fifi indirimbo kuko sinashakaga ko ziza gukoreshwa ku giti cye. Jay Polly yari inshuti, kandi icyo yansigiye ndacyitayeho. Ndategereje umwanzuro w’umuryango mugari, ntabwo ari ibintu umuntu umwe yakwiye kwifatira,” — Li John.
Yakomeje avuga ko hari n’izindi ndirimbo zakozwe n’abandi ba producer, zari zigize album yategurwaga, kandi ko ibyo bikorwa byose byari bigamije gufasha Jay Polly kugaruka ku isoko ry’umuziki nyuma y’ibihe bikomeye yari amaze kunyuramo.
Nyuma y’urupfu rwa Jay Polly rwabaye mu mwaka wa 2021, hari byinshi byibazwaga ku bijyanye n’ibihangano bye byari bikiri mu bikorwa. Kugeza ubu, bamwe mu bakunzi b’umuziki be bacyifuza kumva ibyo atasize asohoye.
Li John, utarigeze ahishura umubare w’indirimbo afite cyangwa izo zindi zigeze ku ruhe rwego, yavuze ko ari ibintu bidasanzwe mu buzima bwe kuba yarakoranye n’umuntu wari ufite impano nk’iya Jay Polly, kandi yiteguye gukorana n’umuryango igihe cyose bazifuza ko izo ndirimbo zasohoka ku mugaragaro.
Icyakora, ibyo bishobora gutegereza igihe, kuko kugeza ubu nta rwego rwa hafi rw’umuryango ruramusaba izo ndirimbo.
Jay Polly, witabye Imana mu buryo butunguranye, yari umwe mu baraperi bari bafite izina rikomeye mu Rwanda no mu karere, akaba yari azwiho ubuhanga n’imvugo zirimo ubutumwa. Yari yaragize uruhare rukomeye mu guteza imbere injyana ya Hip Hop mu Rwanda.
Ubutumwa bwa Li John bwagaragaje uburyo atari yiteguye kwemerera umuntu uwo ari we wese gukoresha izo ndirimbo atabiherewe uburenganzira n’umuryango. Ibi bishobora kuba igisubizo ku bibazo byari byagiye bizamuka ku mbuga nkoranyambaga, aho bamwe bibazaga impamvu ibikorwa bya nyuma bya Jay Polly bitigeze bisohoka cyangwa bigaragara ku mbuga zitandukanye.
Umuziki w’u Rwanda ukomeje gukura, ariko n’abakoze amateka nka Jay Polly bagenda basiga umurage ugomba kurindwa no kubahwa ibyo ari na byo Li John yagaragaje nk’intego ye.
