Liverpool yongeye kwandika amateka akomeye nyuma yo kwegukana igikombe cya Shampiyona y’u Bwongereza, Premier League, itsinze Leicester City ibitego 5-1 mu mukino wabahuzaga cyiciro cya mbere.
Uyu mukino wabereye ku kibuga cya Anfield, wari uryoheye ijisho, aho Liverpool yagaragaje ubuhanga bwo ku rwego rwo hejuru. Ibitego bya Liverpool byatsinzwe na Mohamed Salah (2), Luis Díaz, Cody Gakpo na Dominik Szoboszlai, mu gihe Leicester yatsindiwe igitego kimwe na Jamie Vardy.
Iyi ntsinzi yahesheje Liverpool amanota yatumye itandukana na Arsenal Fc mukeba wayo bakurikiranga ku rutonde rwa shampiyona, ishimangira ko ari yo kipe ikomeye muri iyi mpeshyi. Abakinnyi n’abatoza basangiye umunezero udasanzwe n’abafana babo nyuma y’uyu mukino.
Gary Neville, wahoze akinira Manchester United akaba n’inararibonye mu kibuga, yatangaje ko Liverpool ikwiriye kwitwa ikipe y’ibihe byose mu Bwongereza.
Yagize ati: “Impaka zarangiye. Liverpool ubu iri mu makipe afite ibikombe byinshi by’i Burayi ugereranyije na Manchester United.”
Neville yakomeje avuga ko Liverpool ifite amateka akomeye atari muri Premier League gusa, ahubwo no mu marushanwa mpuzamahanga nka UEFA Champions League n’ibindi bikombe bikomeye by’i Burayi. Yashimye uburyo iyi kipe yubatswe, imiyoborere yayo ndetse n’umuhate w’abakinnyi bayo.
Ku rundi ruhande, Arne Slot, umutoza wa Liverpool, yavuze ko kwegukana igikombe atari iby’ubushobozi bw’abakinnyi gusa, ahubwo ari imbaraga z’ubufatanye, ukwihangana no gukunda ikipe. Yashimiye abafana ba Liverpool, ababwira ko ari bo mutima n’amaraso y’iyi ntsinzi.
Abasesenguzi mu by’imikino bavuga ko Liverpool ifite amahirwe menshi yo gukomeza kwitwara neza no mu yindi myaka iri imbere, cyane ko bafite abakinnyi bato, bafite impano zidasanzwe n’umutoza w’ubuhanga budasanzwe.
Liverpool yegukanye igikombe cya Premier League ku nshuro ya 20, ikomeza gusiga Manchester United mu bijyanye n’ibikombe byo ku rwego mpuzamahanga, ikiyongeraho n’uburyo iyi kipe yitwara neza mu marushanwa atandukanye mu Bwongereza no hanze yabwo.
