Ishyirahamwe ry’Umupira w’Amaguru muri Morocco ryagejeje ikirego ku nzego zireberera ruhago ku Mugabane wa Afurika, risaba ko ikipe y’igihugu ya Senegal yamburwa Igikombe cya Afurika iheruka gutwara. Iri shyirahamwe rivuga ko Senegal yakoze amakosa akomeye mu mukino wahuje impande zombi, aho bivugwa ko abakinnyi bayo bigeze kuva mu kibuga bagahagarika umukino mu gihe cy’igihe gito.
Nk’uko Morocco ibitangaza, yifashishije amategeko agenga amarushanwa ya CAF, by’umwihariko ingingo ya 82, isobanura ko ikipe ifata icyemezo cyo kuva mu kibuga idasoje umukino ihita iterwa mpaga. Abareze bavuga ko n’ubwo abakinnyi ba Senegal baje kugaruka mu kibuga, icyo gikorwa cyagize ingaruka mbi ku mukino, cyane cyane ku bakinnyi ba Morocco.
Morocco ivuga ko guhagarika umukino byahungabanyije imitekerereze n’imyitwarire y’abakinnyi bayo, bituma batitwara uko byari byitezwe mu minota yakurikiyeho. Ibyo bivugwa ko byagize uruhare mu myanzuro y’ukuntu umukino wagenze n’uko warangiye.
Iri shyirahamwe risaba CAF gusuzuma neza ibyabaye, ikareba niba amategeko yarubahirijwe uko bikwiye, bityo hakafatwa icyemezo gishingiye ku mategeko n’uburinganire bw’amakipe yose. Ku ruhande rwa Senegal, ntiharasohoka itangazo rirambuye risubiza ibi birego, ariko biteganyijwe ko CAF izatangaza umwanzuro wayo nyuma yo gusesengura ibirego byatanzwe n’impande zombi.
Iyi dosiye ishobora kugira ingaruka zikomeye ku mateka y’iri rushanwa, bitewe n’icyemezo kizafatwa n’inzego zibishinzwe.
