Nyuma y’imvura nyinshi idasanzwe, intara ya Maputo muri Mozambique yibasiwe n’imyuzure ikomeye yarenze inkombe z’inzuzi igatwarira abaturage ubutaka n’ibikorwaremezo. Ku rwego rw’igihugu, abantu barenga 100 bamaze guhitanwa n’ingaruka z’iyi mvura kuva igihe cy’imvura cyatangira mu Ukwakira, mu gihe abarenga igice cya miliyoni bagizweho ingaruka.
Mu ntara ya Maputo, abantu barenga ibihumbi 36 bagizweho ingaruka n’imyuzure, aho imihanda y’ibilometero byinshi yasenyutse bigatuma ubutabazi butinda kugera aho bukenewe. Rosita Augusto, umwe mu baturage bo muri Maputo, avuga ko bamaze iminsi bafatiwe ku ruhande rumwe rw’amazi bagerageza gutaha n’ubwo bibatera ubwoba. Ati: “Dutinya kwambuka aya mazi ariko dushaka gutaha. Twahisemo gufata icyemezo n’ubwo kirimo ibyago.”
Guverineri w’intara ya Maputo, Manuel Tule, yatangaje ko hakiri ikibazo cy’amakuru adahagije ku byangiritse byose, ariko ko hateganywa ibikorwa byo kugera mu bice byugarijwe n’abantu bategereje gutabarwa. Ku rundi ruhande, abatavuga rumwe na Leta banenga ubuyobozi kuba butarateguye bihagije ibikorwaremezo birwanya imyuzure.
UNICEF ivuga ko iyi myuzure yahindutse ikibazo gikomeye cyane ku bana, kubera amazi mabi, indwara n’imirire mibi, cyane ko Mozambique yinjiye no mu gihe cya serwakira (cyclone). Abayobozi batinya ko umubare w’abahitanwa n’iyi mvura wakomeza kwiyongera mu minsi iri imbere.
