Minisiteri y’Ubuzima mu Bufaransa yatangaje ko hagaragaye umuntu ufite ubwandu bushya bw’ubushita bw’inkende (Monkeypox) buzwi nka clade 1b. Ubu bwandu bukaba bwaragaragaye mu gihugu cy’Ubufaransa, aho inzego z’ubuzima zatangiye gukurikirana hafi iby’iki kibazo kugira ngo hamenyekane inkomoko yabwo ndetse hanakumirwe ikwirakwizwa ryabwo.
Iyi virusi ya Monkeypox, izwiho gutera indwara y’uruhu n’ibimenyetso birimo inkorora, umuriro, hamwe n’ibisebe bishobora gukwira ku mubiri wose, ikomeje kuba ikibazo gikomeye ku buzima bw’abaturage hirya no hino ku Isi. Clade 1b ni ubwoko bushya bwa Monkeypox butaramenyekana cyane mu bihugu byinshi, bityo bigatuma inzego z’ubuzima zifata ingamba zihariye mu guhangana nabwo.
Uyu murwayi wa mbere wavuzwe mu Bufaransa akomeje gukurikiranwa n’inzego z’ubuzima kugira ngo harebwe niba hari abandi bantu baba barahuye nawe bakaba bashobora kuba banduye.
Abaturage basabwe kwitonda, bakurikiza amabwiriza yatanzwe n’inzego z’ubuzima zirimo gukaraba intoki kenshi, kwirinda gukora ku bikomere by’abandi, ndetse no kugana kwa muganga igihe babonye ibimenyetso by’iyi ndwara.
Hashyizweho itsinda ry’abashakashatsi riri kwiga ku buryo iyi clade 1b itandukanye n’izindi clades zasanzwe zizwi, cyane cyane mu buryo yandura no mu buryo bwo kuyirinda.
Ibi bizafasha inzego z’ubuzima gutanga amakuru arambuye ku buryo abaturage babasha kwirinda neza, ndetse bikanatuma habaho uburyo bwo gutegura inkingo cyangwa imiti izajya ikoreshwa mu kuyirwanya.
Abashinzwe ubuzima kandi bakomeje gukorana n’ibigo mpuzamahanga nka OMS (Ishami ry’Umuryango w’Abibumbye ryita ku Buzima) kugira ngo bahuze imbaraga mu gusuzuma ibirebana n’iyi virusi nshya.
Ibi bikorwa bigamije gufasha ibihugu byose kwitegura guhangana n’icyorezo mu gihe byaba bigaragaye ko ishobora gukwirakwira ku buryo bwihuse.
Mu mwaka ushize, virusi ya Monkeypox yagaragaye mu bihugu bitandukanye by’Isi, bigaragara ko ikwirakwiriye ahanini biciye mu mibanire ya hafi hagati y’abantu. Gusa, ubwoko bwa clade 1b bwagaragaye bushya buhangayikishije abashinzwe ubuzima kuko bugaragaza imiterere itandukanye n’ubundi bwoko bwari busanzwe buzwi.
Mu bindi bihugu by’Uburayi, inzego z’ubuzima ziri gukomeza gukora ubukangurambaga bugamije gukumira ikwirakwizwa rya Monkeypox, harimo gukangurira abantu kwipimisha hakiri kare igihe babonye ibimenyetso ndetse no gukingirwa ku bushake aho bishoboka.
Ubufaransa bwashyize imbere uburyo bwo gutanga amakuru ahagije ku baturage kugira ngo birinde kandi bamenye uko bakwitwara igihe baba bakeka ko banduye.
Abahanga mu by’ubuzima basabye ko abantu bakomeza kwirinda, cyane cyane mu bice by’ibihugu byagaragayemo iyi clade nshya. Bashishikarije kandi abantu bose gukurikiza gahunda z’isuku no gukorana n’inzego z’ubuzima kugira ngo hafatwe ingamba hakiri kare.
