Perezida wa Repubulika y’u Rwanda, Nyakubahwa Paul Kagame, yitabiriye Urugendo rwo Kwibuka Jenoside yakorewe Abatutsi mu 1994, ruzwi nka Walk to Remember, rutegurwa buri mwaka mu rwego rwo gufasha Abanyarwanda n’inshuti z’u Rwanda kuzirikana amateka y’ayo mahano, ndetse no gukomeza urugendo rw’ubwiyunge n’iterambere.
Uru rugendo rwabaye ku wa 7 Mata 2025, umunsi nyirizina u Rwanda rwibukaho ku nshuro ya 31 Jenoside yakorewe Abatutsi.
Rwatangiriye ku biro by’Akarere ka Gasabo, abaryitabiriye banyura mu muhanda munini wa Kigali berekeza kuri BK Arena, ahabereye umuhango wo gusozanya ibikorwa byo kwibuka hifashishijwe ibiganiro, indirimbo z’ubutumwa n’amasengesho.
Ni urugendo rwitabiriwe n’ibihumbi by’Abanyarwanda b’ingeri zitandukanye, barimo urubyiruko, ababyeyi, abarokotse Jenoside, ndetse n’abayobozi bo mu nzego z’igihugu.
Hari kandi intumwa z’amahanga zirimo abahagarariye ibihugu byabo mu Rwanda n’abakozi b’imiryango mpuzamahanga ikorera mu gihugu.
Mu ijambo rye, Perezida Kagame yashimangiye ko urugendo nk’uru rutuma Abanyarwanda bibuka amateka yaranze igihugu cyabo, bikabafasha gukomeza gukomera ku bumwe, gukundana no kwirinda icyatuma igihugu gisubira mu mwijima.
Yashimiye urubyiruko uruhare rugenda rugira mu kubungabunga amateka no kwima amatwi ingengabitekerezo ya Jenoside.Yagize ati: “Kwibuka ni umuhigo twiyemeje twese nk’Abanyarwanda. Ni inzira yo guha icyubahiro abacu bazize Jenoside, ariko kandi ni n’urugendo rutwibutsa ko dufite inshingano zo kubaka u Rwanda rwiza rutekanye kandi rudakandamiza.”
Urugendo Walk to Remember rufite insanganyamatsiko ijyanye n’iyo Kwibuka31, igira iti: “Kwibuka Twiyubaka”, ikangurira buri wese kugira uruhare mu gusigasira amateka, kurwanya ingengabitekerezo ya Jenoside, no gukomeza kubaka igihugu gishyize imbere ubumwe n’iterambere rirambye.
