Perezida watowe wa Leta Zunze Ubumwe za Amerika, Donald Trump, yavuze ko afite umugambi wo kuganira na Perezida w’u Burusiya, Vladimir Putin, ndetse na Perezida wa Ukraine, Volodymyr Zelensky, mu rwego rwo kugerageza guhagarika intambara iri hagati y’ibi bihugu byombi.
Iyi ntambara imaze imyaka irenga ibiri, ikaba yarateje umubabaro ukomeye ndetse n’ibihombo bitabarika ku baturage b’ibi bihugu no ku Isi muri rusange.
Trump yatangaje ibi mu kiganiro n’abanyamakuru cyabereye mu rugo rwe rwa Mar-a-Lago, ku wa Mbere. Iyi ntambwe ije mu gihe yakomeje kugaragaza ko ashaka kugarura ubuhanga mu gukemura amakimbirane ku rwego mpuzamahanga, nk’umwe mu byiciro yibandaho mu gihe yiyamamariza kongera kuyobora Leta Zunze Ubumwe za Amerika.
Ubwo Trump yabazwaga niba yaba yarigeze kuganira na Putin mu minsi yashize, nk’uko byari byatangajwe n’itangazamakuru, yanze kugira icyo avuga ku byo yagiranye na Perezida w’u Burusiya.
Gusa, yavuze ko afite gahunda yo kubikora mu bihe biri imbere. Mu magambo ye, Trump yagize ati:
“Tuzaganira na Perezida Putin ndetse n’abamuhagarariye, hamwe na Zelensky n’abamuhagarariye. Tugomba kubihagarika. Ni ubwicanyi. Ni ubwicanyi tutari twarigeze tubona kuva mu Ntambara ya Kabiri y’Isi. Bigomba guhagarara, kandi ndatekereza ko nshobora gukora ibishoboka byose kugira ngo bihagarare.”
Trump yakomeje kuvuga ko kuba intambara ikomeje kuba ku rugero nk’uru bigaragaza ko hari ibyabaye intege nke mu guhuza ibihugu byombi no gukumira amakimbirane mbere y’uko akura.
Yongeraho ko intambwe nk’iyi iteganywa igamije guteza imbere ibiganiro by’amahoro birambye.
Mu bihe byo kwiyamamaza, Trump yagaragaje inshuro nyinshi ko afite ubushobozi bwo kurangiza intambara hagati y’u Burusiya na Ukraine mu gihe gito cyane, aho yemeje ko yakoresha ubushobozi bwose Leta Zunze Ubumwe za Amerika ifite mu kugira uruhare mu biganiro bigamije amahoro.
Yagize ati: “Ndabizi neza ko bishoboka. Mu munsi umwe gusa naba mbashije gufasha ibi bihugu guhagarika amakimbirane. Ntabwo dukeneye ko ubuzima bukomeza kuburirwa ubusa ku bw’intambara zitagira umumaro.”
Uyu mugambi wa Trump ushingiye ku ngamba zikomeye zashyirwa mu bikorwa ngo amahoro agarurwe mu Burusiya na Ukraine. By’umwihariko, Trump yavuze ko azakoresha inzira yo kuganiriza abayobozi bombi hagamijwe guhuza impande zitavuga rumwe kandi azakoresha amayeri y’ubudiplomasi.
Trump yashimangiye ko intambara yo muri Ukraine ifite ingaruka zihanitse ku rwego mpuzamahanga, cyane cyane mu rwego rw’ubukungu.
Yavuze ko izi ngaruka zibangamiye Isi muri rusange, zituma ibiciro by’ibikomoka kuri peteroli bizamuka, ibiribwa bihenda, ndetse n’ubukungu bw’ibihugu byinshi bukomeza guhungabana.
Mu gihe yasesenguraga, yavuze ko Leta Zunze Ubumwe za Amerika, kimwe n’ibindi bihugu bikomeye, bifite inshingano zo gukora ibishoboka byose kugira ngo intambara nk’iyi ihagarare.
Yagize ati: “Iyi ni inshingano yacu nk’abayobozi b’Isi, tugomba gukora ibishoboka byose kugira ngo intambara nka ziriya zihagarare vuba. Ntabwo ari ibintu bigomba kureberwa gusa, ni umusaruro mubi ku Isi.”
Nubwo Trump atavuze igihe nyacyo azatangirira ibiganiro n’abakuru b’ibihugu byombi, iki cyizere cye cyatumye hari bamwe mu baturage n’abasesenguzi b’ibya politiki bishimira ko intambwe yo kuganira igiye guterwa.
Ku rundi ruhande, hari abakeka ko kumvikanisha u Burusiya na Ukraine bizasaba ingufu nyinshi, kuruta uko Trump abyumvikanisha.
Trump yavuze ko intambara hagati y’u Burusiya na Ukraine igomba guhagarara, yemeza ko ari ubwicanyi budakwiriye kwihanganirwa.
