Princess Leonor ufite imyaka 20 y’amavuko, ari mu rugendo rwo kwitegura inshingano zikomeye zo kuzayobora igihugu cye nk’Umwamikazi. Ibi ni amateka mashya muri Espagne, kuko azaba ari Umwamikazi wa mbere uyoboye igihugu ku giti cye (Queen Regnant) mu gihe kirenze imyaka 150 ishize. Uwa nyuma wabigezeho ni Umwamikazi Isabella II, wategetse mu kinyejana cya 19.
Leonor ni imfura y’Umwami Felipe VI n’Umwamikazi Letizia, akaba ari na we uzaragwa ingoma hakurikijwe amategeko y’igihugu. Kuva akiri muto, yagiye ategurwa buhoro buhoro inshingano z’ubwami, binyuze mu masomo yihariye, imyitozo ya gisirikare, ndetse no kwitabira ibirori n’ibikorwa by’igihugu bigamije kumumenyereza inshingano azahabwa.
Umuryango w’abami wa Espagne, uzwi nk’aba Bourbon, umaze gutegeka igihugu kuva mu ntangiriro z’ikinyejana cya 18. Uyu muryango washinze ubutegetsi bwawo nyuma y’intambara yo guharanira ingoma ya Espagne, maze uba inkingi ikomeye mu mateka n’imiyoborere y’iki gihugu.
Mu 1975, Espagne yinjiye mu kindi gihe cy’amateka yayo, nyuma y’urupfu rwa Francisco Franco wari warayoboye igihugu mu butegetsi bw’igitugu imyaka igera kuri 40. Umwami Juan Carlos I ni we wasubijeho ubwami, anashyira igihugu mu nzira ya demokarasi n’ubwiyunge. Mu 2014, yeguye ku ngoma ayisigira umuhungu we Felipe VI, ari na we se wa Princess Leonor.
Uyu mukobwa akomeje gufatwa nk’icyizere gishya cy’ubwami bwa Espagne n’ahazaza h’igihugu mu miyoborere ihuza amateka n’igihe cya none.
