Uwahoze ari umunyezamu wa Real Madrid na Paris Saint-Germain, Keylor Navas, amaze kwinjira mu ikipe ya Newell’s Old Boys yo muri Argentine ku buntu, nyuma y’aho amasezerano ye na Nottingham Forest arangiriye. Navas, w’imyaka 37, yasinye amasezerano y’imyaka itatu azamugeza muri 2026 muri iyi kipe ifite amateka akomeye muri Amerika y’Amajyepfo.
Ikipe ya Newell’s Old Boys, izwiho kuba yarareze ibyamamare nka Lionel Messi na Marcelo Bielsa, yemeje ko yaguze Navas nyuma yo kumara amezi menshi bagerageza kumwegukana ntibikunde.
Uyu munyezamu ukomoka muri Costa Rica afatwa nk’icyamamare gifite ubushobozi bwo kuzamura urwego rw’ikipe mu buryo bukomeye.
Navas yageze muri Argentine yakirwa n’imbaga y’abafana bishimiye bikomeye kuza kwe muri iyi kipe. Mu kiganiro yagiranye n’itangazamakuru, yavuze ati: “Ndishimye cyane kuba ngiye gukinira Newell’s Old Boys. Ni ikipe ifite amateka akomeye, kandi ndifuza kuyifasha kugera ku ntsinzi.”
Ikipe y’ikitegererezo nka Newell’s Old Boys kubona umukinnyi w’inararibonye nka Navas ku buntu ni intambwe ikomeye mu guhangana ku rwego rwo hejuru muri shampiyona ya Argentine no mu marushanwa mpuzamahanga nka Copa Libertadores.
Navas, watsindiye Ballon d’Or ya CONCACAF inshuro nyinshi, azanye ubunararibonye bukomeye bwo gukina ku rwego rw’Isi, harimo gutwara ibikombe bitatu bya Champions League akiri muri Real Madrid. Abafana ba Newell’s Old Boys batekereza ko azaba intandaro y’impinduka zikomeye mu ikipe yabo, by’umwihariko ku bijyanye no guhatana n’amakipe akomeye muri shampiyona.
Iki gikorwa cyerekana uburyo ikipe ya Newell’s Old Boys yifuza kongera kuba ku rwego rwiza, ikoresha neza amahirwe yo kubona umukinnyi w’icyitegererezo utari ukwishyurwa.
