Umutoza w’ikipe ya Manchester City, Pep Guardiola, yamaze gutandukana n’uwari umugore we Cristina Serra, nyuma y’imyaka 30 bari bamaze mu rushako. Aya makuru yashimangiwe n’inshuti za hafi z’aba bombi, zivuga ko bahisemo kubishyira ahagaragara nyuma y’imyaka itandatu bamaze batabana.
Cristina Serra, wamenyekanye nk’umunyamideli, yahuye bwa mbere na Pep mu myaka ya za 1980 ubwo uyu mutoza yari akiri umukinnyi w’umupira w’amaguru mu ikipe ya FC Barcelona. Uru rugendo rw’urukundo rwabo rwaje gukura, ndetse muri 1994 bakora ubukwe bwagizwemo uruhare rukomeye n’imiryango yabo n’inshuti za hafi.
Mu gihe cy’imyaka 30 bari bamaranye, babashije kubyarana abana batatu: Maria, Màrius, na Valentina, bakomeje guhuza umuryango wabo mu buryo bwihariye.
Amakuru y’itandukana ryabo agaragaza ko, nubwo batari bakibana mu buryo busanzwe, bakomeje gusigasira ubuzima bw’umuryango, cyane cyane kugira ngo abana babo batagira icyo babura mu rukundo rw’ababyeyi babo.
Icyemezo cyo gutandukana burundu cyafashwe mu buryo bwitondewe nyuma yo kugisha inama abantu bo mu muryango ndetse n’inshuti za hafi.
Mu mpera z’ukwezi gushize, bamenyesheje imiryango yombi ibyerekeranye n’iyi myanzuro, icyemezo bakomeje kugerageza kugumana nk’ibanga igihe kirekire.
Pep Guardiola, uzwiho kuba umwe mu batoza b’abahanga ku Isi, ari mu bihe byiza mu mwuga we wo gutoza, aho amaze gutwara ibikombe bitabarika harimo n’igikombe cya UEFA Champions League aheruka gutwara mu mwaka wa 2023.
N’ubwo akazi ke gakomeje kumuhesha ishema, amakuru y’itandukana rye na Cristina yashimangiye ko nawe ari umuntu usanzwe, ugira ibibazo by’umubano nk’abandi bose.
Cristina Serra, ku rundi ruhande, yakomeje ibikorwa bye mu rwego rw’imideli, aho azwiho kugira ibitekerezo byihariye mu byerekeranye no gutegura no guhanga imyambaro igezweho. N’ubwo batandukanye, bombi bagaragaje ubushake bwo gukomeza kugirana ubufatanye mu gutegura ejo hazaza h’abana babo.
Itandukana rya Guardiola na Serra ni inkuru ikomeje kuvugwa cyane mu itangazamakuru mpuzamahanga, aho benshi bibaza uko ibi bishobora kugira ingaruka ku buzima bw’umutoza ndetse n’imyitwarire ye mu kazi. N’ubwo ari inkuru y’akababaro ku bakunzi b’aba bombi, benshi bagaragaje ko bashimishijwe n’ukuntu bashoboye gukemura ikibazo cyabo mu mahoro no kubungabunga ishema ry’umuryango wabo.
