Umuhanzi ukomoka muri Nigeria, Wizkid, amaze imyaka ari mu ba mbere b’ibyamamare bya muzika muri Afurika, yagaragaje ubuhamya butangaje ku bijyanye no gukorana na Beyoncé. Wizkid yamenyekanye cyane kubera indirimbo zitandukanye, ariko “Brown Skin Girl” yafatanyije na Beyoncé mu mushinga we The Lion King: The Gift, yatumye yinjiza amafaranga menshi.
Mu kiganiro Wizkid yagiranye n’ibitangazamakuru, yavuze ko yishyuwe miliyoni $5, ni ukuvuga asaga miliyari 7 z’amafaranga y’u Rwanda, kugira ngo aririmbe mu gace gato k’iyi ndirimbo.
N’ubwo yari afite intego yo gutanga umusanzu w’ubuntu mu kubaka umushinga wa Beyoncé, byaje kurangira umuryango we hamwe n’abo bakorana bamugiriye inama yo kwemera iyi nyungu ikomeye.
Wizkid yagize ati: “Brown Skin Girl yari indirimbo isanzwe ifite ubutumwa bukomeye bwo gushimangira ubwiza bw’abagore b’abirabura. Narimfite intego yo gutanga ijwi ryanjye nk’uburyo bwo gushyigikira uyu mushinga, ariko inama nakuye ku bo dukorana zatumye ntekereza ku gaciro kanjye mu ruganda rwa muzika.”
Ni kenshi Wizkid yagiye agaragaza ko gukorana na Beyoncé byahinduye byinshi mu buzima bwe bw’umwuga.
Mu gihe “Brown Skin Girl” yamenyekanye cyane ku Isi yose ndetse igahabwa ibihembo bitandukanye birimo Grammy Award, ni na bwo Wizkid yahise afata indi ntambwe mu kuba umuhanzi w’icyitegererezo ku rwego mpuzamahanga.
Uyu muhanzi yongeye gushimira Beyoncé avuga ko gukorana na we byamweretse uko ubucuruzi bw’umuziki bukorwa ku rwego rwo hejuru. Yashimangiye ko aya mahirwe yamweretse ko, uretse impano n’ubuhanga, kumenya agaciro k’ibyo ukora ari ingenzi mu iterambere ry’umwuga wawe.
