Abagabo Batatu b’Abashinwa bafatiwe muri DRC bacukura Zahabu mu buryo bunyuranyije n’amategeko

Mu gihugu cya Repubulika Iharanira Demokarasi ya Congo (DRC), abagabo batatu bakomoka mu Bushinwa bafatiwe mu bikorwa byo gucukura zahabu mu buryo butemewe n’amategeko. Aba bagabo bafashwe bafite udupaki icumi twa zahabu ndetse n’amafaranga angana na $400,000.

Nyuma yo kuburanishwa, urukiko rwabakatiye igihano cyo gufungwa imyaka irindwi ndetse n’ihazabu ingana na $600,000.

Iki kibazo cyateje impagarara mu baturage ndetse no mu nzego z’umutekano z’iki gihugu, aho bibajije uburyo ibikorwa nk’ibi byakomeje gukorwa mu gihe cyari cyaragaragajwe ko bihombya Igihugu.

Zahabu yafatanywe aba bantu yagaragaje uburyo ubutunzi bw’Igihugu bukomeje kunyerezwa n’abantu badashaka gukorera mu mucyo.

Uretse igihano cy’igifungo, urukiko rwategetse ko nyuma yo kurangiza igihano cyabo bazahita birukanwa mu gihugu, kuko ibikorwa byabo byashimangiye ko bakomeje kwangiza umutungo kamere wa DRC, Igihugu kimaze igihe gihangana n’ibibazo by’ubukungu n’umutekano muke biterwa n’ubucukuzi butemewe.

Ikibazo cy’ubucukuzi bw’amabuye y’agaciro mu buryo butemewe gikomeje kuba ihurizo rikomeye ku gihugu cya DRC. Imibare igaragaza ko ibice binini by’ubutaka bw’igihugu byakomeje kwibasirwa n’abashoramari baturuka hanze y’igihugu, cyane cyane mu bihugu nka Aziya na Amerika y’Epfo, bakoresha inzira zitemewe mu gucukura zahabu, diyama, na coltan.

Minisitiri ushinzwe umutungo kamere muri DRC yagaragaje ko hagiye gufatwa ingamba zikomeye mu guhangana n’iki kibazo. Harimo kongera imbaraga mu igenzura ry’ibikorwa byo gucukura amabuye y’agaciro, kunoza amategeko ahana abakora ibyaha byo kunyereza umutungo kamere w’Igihugu, ndetse no gukorana n’amahanga mu guhana abakoresha inyandiko mpimbano n’abatwara amabuye y’agaciro mu buryo bunyuranyije n’amategeko.

Abaturage basabye leta gushyira imbaraga mu guhashya ubucukuzi butemewe, kuko uretse kuba bihombya Igihugu, binateza ibibazo bikomeye ku bidukikije.

Icyo bifuza cyane ni uko Igihugu cyakungukira ku mutungo kamere mu buryo bwubahirije amategeko kandi bukorewe mu mucyo, bityo abaturage bakava mu bukene igihugu cyugarijwe.