Arsenal yamaze kwibikaho umukinnyi Piero Hincapié

Ikipe ya Arsenal yo mu gihugu cy’u Bwongereza iri mu myiteguro yo kugura burundu myugariro Piero Hincapié, nyuma yo kumvikana na Bayer Leverkusen ku masezerano y’uyu mukinnyi ukomoka muri Ecuador.

Amakuru aturuka mu banyamakuru bakurikiranira hafi iby’igura n’igurisha ry’abakinnyi mu Burayi avuga ko Arsenal yamaze kumvikana na Bayer Leverkusen ku buryo bwose bwo gutwara uyu mukinnyi. Biteganyijwe ko iyi kipe yo mu mujyi wa Londres izishyura amafaranga agera kuri miliyoni 52 z’amayero kugira ngo ibone uburenganzira busesuye kuri Hincapié.

N’ubwo Arsenal igiye kumugura burundu, Bayer Leverkusen yemeye aya masezerano ishyiramo ingingo ivuga ko izajya ibona 10% by’amafaranga azava mu igurishwa rye mu gihe Arsenal yazamugurisha mu y’indi kipe mu bihe biri imbere.

Piero Hincapié amaze igihe yigaragaza nk’umwe muri bamyugariro bafite impano idasanzwe mu mupira w’amaguru w’i Burayi. Uyu mukinnyi w’imyaka iri mu kigero cy’ubakiri bato yigaragaje cyane mu mikinire irimo kwirwanaho neza, gusoma umukino no gutanga umusanzu.

Abatoza ba Arsenal bavuga ko bishimiye cyane imikinire ye ndetse ko ari umwe mu bakinnyi bashobora gufasha iyi kipe kugera ku ntego zayo mu marushanwa atandukanye arimo Shampiyona y’u Bwongereza ndetse n’andi marushanwa yo ku mugabane w’u Burayi.

Ku ruhande rwa Bayer Leverkusen, n’ubwo bemeye kumurekura, bishimiye ko bashyizeho ingingo ya 10% izabafasha mu gihe uyu mukinnyi yazagurishwa indi kipe mu myaka iri imbere.

Iyi transfer iramutse irangiye burundu, byaba ari indi ntambwe ikomeye Arsenal iteye mu gukomeza kubaka ikipe ikomeye ishobora guhatanira ibikombe mu Bwongereza no ku mugabane w’u Burayi.