Ikipe ya AFC Bournemouth yo mu Bwongereza yamaze kumvikana na Vasco da Gama ku masezerano yo kugura rutahizamu wo ku ruhande Rayan, umwe mu bakinnyi bakiri bato bari kwigaragaza cyane ku mugabane wa Amerika y’Epfo. Aya masezerano yemerejwemo mu magambo (deal in principle), aho agaciro kayo kagera kuri miliyoni 35 z’amayero, harimo n’inyongera zitandukanye.
Impande zombi zamaze kumvikana ku by’ingenzi byose, ubu hakaba hasigaye guhererekanya no kugenzura inyandiko z’amasezerano, mbere y’uko Rayan akora ibizamini by’ubuzima (medical tests) biteganyijwe mu minsi ya vuba. Ibi birerekana ko impande zombi zifite icyizere cy’uko iyi transfer igomba kugenda neza nta nkomyi.
Rayan, ukina asatira aciye ku ruhande, afatwa nk’imwe mu mpano zidasanzwe muri Brazil muri iyi minsi. Umuvuduko, ubuhanga ku mupira, no kureba izamu ni bimwe mu byatumye yigarurira imitima y’abafana ba Vasco da Gama, ndetse bikamuhesha gukurikiranwa n’amakipe menshi akomeye yo ku Mugabane w’u Burayi.
Kujya muri Premier League, imwe mu marushanwa akomeye ku Isi, ni intambwe ikomeye mu rugendo rwe rw’umupira w’amaguru. Bournemouth irabona Rayan nk’umukinnyi ushobora kongerera imbaraga ubusatirizi bwayo.
Ku bafana ba Bournemouth, ni inkuru ishimishije yerekana icyerekezo cyo gushora mu mpano zikiri nto. Ku bakunzi b’umupira w’amaguru, ni ikimenyetso cy’uko Premier League ikomeje gukurura impano nziza ku rwego rw’Isi.
