Coach Gael nawe yaba agiye gukuramo ake karenge mu muziki?

Nyuma y’imyaka mike cyane mu ruganda rw’imyidagaduro, byumvikanye ko Coach Gael ashobora kuba ageze aho arambirwa no gukomeza gushora amafaranga ye mu gufasha abandi badahita bamugarurira inyungu. Ni ubutumwa yashyize hanze abinyujije ku mbuga nkoranyambaga ze, aho yagaragaje agahinda n’ukwicuza avuga ko yirengagije inyungu ze bwite igihe kirekire.

Mu magambo yuje amarangamutima, Coach Gael yagize ati:
“Nakoresheje amafaranga menshi, nafashije abantu benshi ngira impuhwe nyinshi ntakeneye ibingarukira. Ubu noneho ni igihe cyanjye cyo kwirebaho.”

Ibi byahise byumvwa nk’impuruza kuri benshi, bagaragaza ko na we ashobora kuba agiye mu murongo w’abandi benshi bamaze gucika intege mu ishoramari rishingiye ku muziki. Benshi bahita bibuka uburyo abatangiye mbere ye nka Bad Rama, Mutangana Richard, Richard Nsengumuremyi n’abandi bagiye bacika intege nyuma yo gushora akayabo mu muziki wo mu Rwanda.

Urugendo rwa Coach Gael mu muziki

Karomba Gael, uzwi cyane nka Coach Gael, yamenyekanye cyane mu 2022, ubwo hacicikanaga amakuru ko The Ben yabonye umushoramari mushya. Ariko ibyo byahise bivaho vuba, urukundo rwabo rwa muzika ruhinduka intambara y’ubucuti bwahindutse uburakari.

Icyemezo yafashe cyo kuva kuri The Ben akajya gushora imari kuri Bruce Melodie cyahindutse intandaro y’intambara y’ubucuruzi, ibintu byarushijeho gushyuha no mu itangazamakuru. Aho haje gukurikirwa n’uko ashyiraho studio ye bwite yitwa 1:55AM, isanzwe yakorerwagamo na Producer Element—n’ubwo bivugwa ko nawe yahoze yayivamo gahoro gahoro.

Coach Gael yagiye akorana n’abahanzi batandukanye barimo Bruce Melodie, Ross Kana na Kenny Sol. Yafashije benshi mu buryo butaziguye, ku buryo bamwe bamwita “umukire umwe mu gace k’abakene.” Ariko se yaba ageze aho yumva ko adakwiye gukomeza gutakaza akayabo mu ruganda rutamuha inyungu zihuse?

Abaruhariwe bamubanjirije nabo ntibabashije kurenga iyo ntera

Coach Gael ntabwo yaba ari uwa mbere ugeze aho acika intege. Hari abandi bamubanjirije kandi bose bafite amateka agaragaza uko bagiye bihina bakabivamo.

Bad Rama – The Mane Music

Bad Rama ni umwe mu bashoramari babiciye bigacika, ariko nawe yigeze gutangaza ko yaguze akayabo karenga ibihumbi 300 by’amadolari mu muziki (asaga miliyoni 400 Frw). Yafashije abahanzi nka Safi Madiba, Marina, Queen Cha n’abandi, ariko ibikorwa bye byagiye bigabanuka gahoro gahoro ku buryo ubu atagikora nk’uko byari bimeze.

Mutangana Richard – Kiwundo Entertainment

Yatangije Kiwundo Entertainment igakorera muri Uganda mbere y’uko iza mu Rwanda mu 2017. Yagiranye imikoranire n’abahanzi barimo Diplomate, Spax, Umutoni Milly ndetse na Miss Erica (uherutse kwitaba Imana). Nubwo yari afite intego nyinshi, birangiye Kiwundo itakaje umurongo, nta n’umuhanzi uzwi yasinyishije nyuma y’igihe gito.

Richard Nsengumuremyi – Super Level

Yari nyiri Super Level, imwe mu nzu zamenyekanye cyane mu 2013. Yakoranaga na Urban Boyz, Bruce Melodie, Fireman n’abandi. Nyuma y’akajagari karimo no kujya mu nkiko na Bruce Melodie, ibikorwa byayo byararangiye burundu mu 2016. Richard nawe birangiye asezeye ku muziki atabivuze mu magambo, ariko ibikorwa bikabyivugira.

Theodomir Mutesa – Touch Records

Yatangije Touch Records mu 2014, ikaba yari imwe mu nzu zikomeye zifasha abahanzi mu Rwanda. Yari ifite studio z’amajwi n’amashusho, ndetse na Website. Yanyuzemo abahanzi nka Jay Polly, Bulldogg, Diplomate, n’abandi. Ariko ibibazo byatewe n’abo yari yarazanye mu kazi birimo abavandimwe be, byatumye ibintu byose bisenyuka.

Ese ikibazo kiri he? Ni abashoramari cyangwa ni umuziki?

Ubushoramari mu myidagaduro mu Rwanda buracyafite imbogamizi. Nubwo hari abatinyuka kubugerageza, benshi babuvamo kubera:

• Kwitega inyungu zihuse: Abenshi bashora amafaranga biteze kuyasubirana mu gihe gito, nyamara umuziki ubusanzwe usaba igihe, umwete n’imikoranire ihamye.
• Kwitiranya umuziki no kwimenyekanisha: Hari abashora atari uko bashaka kunguka ahubwo bashaka kuba “bazwi”, ariko iyo iyo ntego igeze ho igasohora, ntibaba bagifite inyota yo gukomeza.
• Icyenewabo n’ubumenyi buke: Benshi bagira amakosa yo guha inshingano inshuti n’abavandimwe batabifitiye ubushobozi.
• Ubugambanyi: Hari abavuga ko hari abayobozi b’imiziki, abanyamakuru, abajyanama n’abandi bafasha abashoramari mu buryo butari bwiza, bakabashuka cyangwa bakabacucura.

Icyo bivuze kuri Coach Gael

Niba koko ibyo yatangaje ari byo, bivuze ko agiye kwibanda ku bindi bikorwa bifite inyungu zihuse. Si ibintu byamutungura wenyine, ahubwo bishushanya uko uru ruganda rugoye kurugumamo udafite urwego ruhagije rw’imiyoborere, ubumenyi n’umurongo w’igihe kirekire.

Umuziki ni ishoramari risaba kwihangana, kumenya abo ukorana nabo, no gusobanukirwa n’imiterere y’uru ruganda rw’imyidagaduro. Niba Coach Gael agiye guhagarika ishoramari, yaba akurikije inzira y’abandi benshi babanje.