Nyuma y’igihe kinini ari hanze y’ikibuga kubera imvune ikomeye y’imbavu ya Ligament Croisé Antérieur (ACL), myugariro wa Real Madrid, Dani Carvajal usanzwe akina ku ruhande rw’iburyo, yatangiye imyitozo yoroheje.
Ibi ni inkuru nziza ku bafana ba Hala Madrid ndetse n’ikipe y’Igihugu ya Espagne, dore ko Carvajal ari umwe mu bakinnyi bakomeye ku ruhande rw’iburyo bw’ubwugarizi.
Carvajal, wari umaze amezi atari make hanze, yatangaje ko yishimiye kongera gukora imyitozo, avuga ati: “Ubu ko nongeye kugaruka mu kibuga biranshimishije cyane, Sinigeze ntekereza ko nzagaruka vuga bitewe n’imvune nari mfite.”
Aya magambo agaragaza uko yumva ubuzima bwe bwo gukina ruhago nk’uwabigize umwuga bugenda busubira ku murongo, ndetse n’icyizere afite cyo kugaruka mu murongo yarasanzwe akinamo.
Uyu mukinnyi ufite ubunararibonye, wamenyekanye cyane mu ikipe ya Real Madrid, amaze imyaka irenga icumi akinira iyi kipe yo muri Espagne muri shampiyona y’icyiciro cya mbere ‘La Liga’.
Imvune y’ACL( Anterior Cruciate Ligament) yari yamugizeho ingaruka zikomeye, zimusiga adakina imikino myinshi ya shampiyona ya La Liga ndetse n’iy’i Burayi yaba UEFA C hampions League nandi marushanwa atandukanye. Gusa uko bigaragara, urugendo rwo kugaruka mu kibuga ruri hafi kurangira.
Nk’uko byemezwa n’inzobere mu buvuzi bw’imvune, umukinnyi ukize imvune nk’iyi akenera igihe cy’imyitozo ihagije kugira ngo asubire ku rwego rwe rwiza rw’imikinire.
Ni muri urwo rwego Carvajal akomeje imyitozo ye buhoro buhoro, agamije gukomera no kwirinda kongera kuvunika.
Kugaruka kwa Dani Carvajal ni inkuru nziza kuri Carlo Ancelotti, umutoza mukuru wa Real Madrid, dore ko Carvajal ari umwe mu bakinnyi b’inkingi za mwamba mu bwugarizi.
Kandi mu gihe cy’imikino ikomeye iteganyijwe muri La Liga ndetse no muri Champions League, ubunararibonye bwe buzaba ingirakamaro cyane.
Ku bafana ba Real Madrid, gutangira kumubona asubira mu kibuga ni ikimenyetso cyiza cy’uko vuba aha bazongera kumubona yambaye umwambaro w’ikipe yabo, arwanira intsinzi nk’uko bisanzwe.
