Uyu munsi ni umunsi w’ingenzi mu cyumweru cya kabiri cy’urubanza rwa Diddy, aho ashinjwa ibyaha bikomeye birimo gucuruza abantu ku buryo bw’imibonano mpuzabitsina. Hari byinshi biteganyijwe gukorwa mu rukiko harimo gushyiraho inteko iburanisha no kumva amagambo y’ibanze y’impande zombi — ubushinjacyaha n’abunganira Diddy.
Guhitamo abacamanza ni bwo butangira bwa mugitondo
Icyumweru gitangira hatangwa umwanya wo guhitamo abacamanza bazaburanisha uru rubanza. Kugeza ubu haracyari abacamanza 43 basigaye mu itsinda rinini ry’abashobora kuba abacamanza, aho hagomba kuvamo 18 — 12 bazaba ari bo bacamanza nyirizina n’abandi 6 bazaba abasimbura igihe cyose byaba ngombwa.
Abunganira Diddy bavuga ko iyi ntambwe idakwiye gutwara igihe kinini cyangwa ngo ibe igoye. Hari uburenganzira bwo gukuramo abashobora kuba abacamanza mu buryo bwihuse, aho ubushinjacyaha bufite uburenganzira bwo gukuramo 6 naho abaregwa bafite 10. Ibi bituma hari abashobora gukurwamo batabanje kugira impaka cyangwa se gusobanura impamvu ku ruhande ruburwanya.
Amagambo y’ibanze nyuma yo gushyiraho abacamanza
Nyuma yo gushyiraho abacamanza, urubanza ruzakomeza hatangwa amagambo y’ibanze y’impande zombi.
Abunganira Diddy bamaze kugaragaza imwe mu migambi yabo, aho mu rukiko batangaje ko Diddy atari umuntu w’umugome nk’uko ubushinjacyaha bumushinja, ahubwo ko ari umuntu wagiraga imyitwarire nk’iy’abantu bashaka gukorana imibonano mpuzabitsina idasanzwe, kandi ko ibyabaye hagati ye na Cassie byari iby’impande zombi, atari urugomo ruturutse ku ruhande rumwe gusa.
Ku ruhande rw’ubushinjacyaha, nabo biteguye gutanga amagambo yabo y’ibanze, bikaba bizaba bitangaje kureba aho baganisha urubanza.
Abatangabuhamya batatu bitezwe ku ruhande rw’ubushinjacyaha
Icyumweru kirimo abatangabuhamya batatu bazahamagarwa n’ubushinjacyaha, nubwo bitaremezwa neza niba hazaboneka umwanya uhagije wo kumva umutangabuhamya uyu munsi ku wa Mbere. Ibi byose bikaba bigaragaza ko hari byinshi bikomeye bigiye kumvwa mu rukiko, bityo abantu bakaba bakwiye gukomeza gukurikira hafi ibiri kubera muri uru rubanza.
Diddy akomeje kwiregura avuga ko ari umwere
Diddy ahagaze imbere y’urukiko ashinjwa ibyaha 5 birimo gucuruza abantu ku buryo bw’imibonano mpuzabitsina, gukoresha ubusambanyi no kwitabira ibikorwa by’amashyirahamwe y’ubugizi bwa nabi (racketeering). Kugeza ubu ariko yamaze kwiregura avuga ko atari umunyacyaha, ndetse akomeje gusaba ko ahanagurwaho ibi byaha byose.
