Mukandayisenga Jeannine uzwi nka ‘KaBoy’, umwe mu bakinnyi bakomeye mu mupira w’amaguru w’abagore mu Rwanda, yerekeje muri Tanzania aho agiye gukinira ikipe ya Yanga Princess. Uyu mukinnyi wari usanzwe akinira Rayon Sports Women Football Club, yavuye mu Rwanda nyuma y’uko ibiganiro by’imikoranire bimaze iminsi bigorana ariko bikaza kugera ku musozo.
KaBoy, wamenyekanye cyane mu Rwanda kubera umuvuduko we no kuba afite ubuhanga bwo gutsinda ibitego ku buryo buhoraho, ni umwe mu bakinnyi bagize uruhare rukomeye mu guteza imbere Rayon Sports WFC.
Yagize uruhare mu kwigaragaza kw’ikipe ya Rayon Spiorts y’abagore muri shampiyona y’abagore mu Rwanda, aho yerekanye ko afite ubushobozi bwo gukina ku rwego mpuzamahanga.
Umutoza wa Rayon Sports WFC yagaragaje ko Mukandayisenga Jeannine azasiga icyuho gikomeye muri iyi kipe, ashimangira ko ubwitange n’umuhate yari asanganywe bizagorana kubisimbuza.
Icyakora, yagize ati: “Nka Rayon Sports twishimiye kubona umukinnyi wacu ajya gukina hanze, kuko bitanga ishusho nziza y’uko ikipe yacu itanga amahirwe yo kugaragaza impano.”
Yanga Princess, ikipe nshya ya KaBoy, ni imwe mu makipe akomeye muri shampiyona y’abagore muri Tanzania. Ifite amateka yo guhatanira ibikombe ndetse no kugaragaza ko ishobora kwinjiza abakinnyi bafite ubuhanga bwo ku rwego rwo hejuru.
Kuva yatangazwa nk’umukinnyi mushya w’iyi kipe, abafana ba Yanga Princess bagaragaje ibyishimo by’uko bategereje byinshi kuri we.
Uru rugendo rwa KaBoy ruje ari intambwe ikomeye mu mwuga we w’umupira w’amaguru. Abakunzi b’umupira w’amaguru mu Rwanda n’abafana ba Rayon Sports WFC bashimye intambwe yateye, bavuga ko ari urugero rwiza ku bandi bakinnyi b’abakobwa mu Rwanda.
Byitezwe ko KaBoy azaba umusanzu ukomeye mu kuzamura urwego rw’imikino y’abagore muri Tanzania ndetse n’akarusho ku ikipe ye nshya.
Uyu mukinnyi arashimira Rayon Sports WFC kuba baramubaye hafi, ndetse n’abafana b’iyi kipe kuba barakomeje kumushyigikira mu rugendo rwe rw’umwuga. Yasoje agira ati: “Nzahora ntekereza Rayon Sports nk’umuryango wanjye. Gusa ubu ndi gutangira indi nkuru, nizeye ko izaba nziza.”
