Perezida Paul Kagame, mu kiganiro yahaye abanyamakuru, yagaragaje akababaro ke ku buryo inama zihuza u Rwanda na Repubulika Iharanira Demokarasi ya Congo (RDC) zagiye zifata imyanzuro itajya ishyirwa mu bikorwa na RDC. Perezida Kagame yavuze ko hari igihe yageze akarambirwa kwitabira izo nama, kuko byagaragaraga ko nta musaruro ugaragara zivamo, ahubwo bimeze nko kujya kwifotoza gusa, aho gukemura ibibazo biri hagati y’ibihugu byombi.
Yagize ati: “Hari igihe ugera ukibaza niba kwitabira izo nama hari icyo bimaze, kuko ibyo mwiyemeje gushyira mu bikorwa bitarenga urwego rw’inyandiko.” Yakomeje asobanura ko kuba RDC idashyira mu bikorwa ibyemezo bifatirwa mu nama bituma izo nama zigira agaciro gake, kuko nta kintu cy’ingenzi kihinduka mu mubano w’ibihugu byombi.
Perezida Kagame yavuze ko kwitabira izo nama cyangwa kutazitabira byose bimeze kimwe, kubera ko nta mpinduka zifatika zigaragara mu mikoranire na RDC.
Yagarutse ku buryo iki gihugu cyakomeje kugumura imitwe yitwaje intwaro nka FDLR, inarwanya u Rwanda, kandi bigatuma umutekano mu karere k’Ibiyaga Bigari uhungabana.
Mu magambo ye, Perezida Kagame yashimangiye ko u Rwanda rwifuza amahoro arambye muri aka Karere, ariko asaba ko ibyo bihugu byombi byashyira mu bikorwa imyanzuro iba yafatiwe mu nama.
Yanenze uburyo RDC ikomeza gutinda cyangwa kwirengagiza ishyirwa mu bikorwa ry’ibyo biyemeza, bikaba ikibazo gikomeye mu gukemura amakimbirane.
Perezida Kagame kandi yavuze ko kubaka amahoro bisaba ubufatanye, ubushake, n’ubushobozi bwo gukemura ibibazo mu buryo burambye.
Yashimangiye ko u Rwanda ruzakomeza gukora ibishoboka byose mu gukomeza kubaka amahoro, ariko asaba RDC kureka imvugo zidaherekejwe n’ibikorwa. Iki kiganiro kirambuye yagiranye n’abanyamakuru, cyagaragayemo ibisobanuro byinshi ku bibazo by’umutekano n’imibanire y’ibihugu byombi.
