Mu gihe hasigaye iminsi mike ngo abahanzi Bruce Melodie na The Ben bahurire ku rubyiniro mu gitaramo cya Summer Country Tour kizabera mu Mujyi wa Musanze, Bruce Melodie yatangaje ibyiciro bishya by’amatike birimo n’igeze ku mafaranga 500,000 Frw.
Aya matike mashya arimo Table igura 500,000 Frw ndetse na VIP Lounge igura 100,000 Frw, yiyongera ku yandi yari asanzweho. Mu byiciro bisanzwe, VVIP igura 10,000 Frw, VIP ikagura 5,000 Frw, mu gihe Regular yo igura 2,000 Frw.
Abategura iki gitaramo bavuga ko kongeraho aya matike bishamikiye ku cyifuzo cyo guha abafana amahitamo menshi ajyanye n’ubushobozi bwabo ndetse n’uburyo bifuza gukurikiramo igitaramo.
Nanone kandi, hatangijwe uburyo bushya bwo kugura itike hifashishijwe akanyenyeri, aho ushaka kuyigura ashobora gukoresha kode *797*30*5# kuri telefone ye, ibintu byitezweho korohereza abafana benshi kubona amatike bitabagoye.
Iki gitaramo kiri mu bitaramo bya Summer Country Tour byitezwe kuzahuza imbaga y’abakunzi b’umuziki, cyane cyane abakunda ibikorwa bya Bruce Melodie na The Ben, bamwe mu bahanzi bafite izina rikomeye mu Rwanda no hanze yarwo.
