Umunya-Argentina Lionel Messi, umwe mu bakinnyi b’amateka akomeye mu mupira w’amaguru ku Isi, akomeje kwagura ibikorwa bye hanze y’ikibuga. Amakuru aravuga ko uyu rutahizamu yamaze kugura ikipe yo mu cyiciro cya gatatu muri Espagne yitwa UE Cornellà, mu rwego rwo gushora imari mu mupira no guteza imbere impano z’abakiri bato.
Ikipe ya UE Cornellà isanzwe ikorera hafi y’umujyi wa Barcelona, aho Messi yamaze imyaka myinshi akinira FC Barcelona, ari naho yanditse amateka adasanzwe. Kugura iyi kipe bishobora gusobanura ko ashaka gukomeza kugira uruhare mu iterambere ry’umupira muri aka gace yamazemo igihe kinini.
N’ubwo Lionel Messi atigeze atangaza ku mugaragaro iby’ubu buguzi, amakuru akomeje gukwirakwira mu bitangazamakuru by’imikino i Burayi avuga ko ashaka kubaka umushinga uhamye wo guteza imbere urubyiruko no kuzamura urwego rw’iyi kipe. Ni intambwe ishobora gutuma UE Cornellà igera ku rwego rwo hejuru mu myaka iri imbere.
Ibi bije bikurikira izindi gahunda z’abakinnyi bakomeye bagiye bashora imari mu makipe y’umupira, bagamije gusangiza ubunararibonye bwabo abakiri bato. Ku ruhande rwa Messi, benshi babifata nk’igikorwa cyerekana ko n’iyo yazaba yarangije gukina, azakomeza kuba hafi y’umupira w’amaguru mu bundi buryo bw’iterambere n’ubuyobozi.
