Umuyobozi w’ishyaka ritavuga rumwe n’ubutegetsi muri Tanzaniya, Tundu Lissu, yashinjwe icyaha cyo guhemukira igihugu ku wa Kane nyuma yo gutabwa muri yombi ubwo yari mu kiganiro rusange aho yasabaga ivugururwa ry’amategeko y’amatora mbere y’amatora rusange ateganyijwe mu kwezi kwa cumi.
Lissu, uyobora ishyaka nyamukuru ritavuga rumwe n’ubutegetsi rya CHADEMA, yatawe muri yombi ku wa Gatatu nijoro n’inzego z’umutekano zaho zivuga ko yari akomeje gukangurira abaturage imyigaragambyo.
Abatavuga rumwe n’ubutegetsi muri Tanzania basaba ko hakorwa ivugururwa ry’amategeko y’amatora kugira ngo amatora ateganyijwe azabe mu mucyo no mu bwisanzure.
Ku wa Kane ku gicamunsi, Lissu yagejejwe imbere y’urukiko rwa Kisutu ruherereye i Dar es Salaam, umurwa mukuru w’ubucuruzi wa Tanzaniya, asa n’uwishimye, ari kumwe n’abanyamategeko be n’abandi banyapolitiki bo muri CHADEMA.
Uyu muyobozi w’abatavuga rumwe n’ubutegetsi yashyizwe ku ngufu mu modoka ya polisi ku mugoroba wo ku wa Gatatu, nyuma y’uko arangije kuvugira mu ruhame mu gace ka Mbinga, mu majyepfo y’igihugu, ahari intera irenga ibirometero 1,000 uvuye i Dar es Salaam.
Abaharanira uburenganzira bwa muntu bashinja ubutegetsi bwa Perezida Samia Suluhu Hassan gukoresha imbaraga z’umurengera ku batavuga rumwe na bwo.
Leta yo ihakana ibyo birego. Mu mwaka wa 2017, imyaka itatu mbere y’amatora aheruka, Lissu yarokotse igitero cyo kumwica aho yarashwe inshuro 16. Tanzaniya iteganya gutora Perezida n’abagize inteko ishinga amategeko mu matora yo mu kwezi kwa cumi.
Ishyaka CHADEMA rimaze igihe rinenga uburyo habura komisiyo yigenga ishinzwe amatora ndetse n’amategeko abogamiye ku ishyaka riri ku butegetsi, CCM, rimaze ku butegetsi kuva Tanzania yabona ubwigenge mu 1961.
