Hakomeje kuvugwa byinshi no gutera impagarara ku isohorwa ry’igitabo cya Miss Rwanda 2020, Nishimwe Naomie, nyuma y’uko ashyize hanze igitabo cye cya mbere yanditse. Icyo gitabo gishingiye ku buzima bwe bwa buri munsi ndetse n’ubwo yari afite inshingano zo kuba Nyampinga w’u Rwanda.
Mu gitabo cye, Naomie agaruka ku rugendo rwe rw’ubuzima, imbaraga yakoresheje ngo agere ku ntsinzi, hamwe n’amasomo y’ubuzima yakuye mu byo yanyuzemo.
Ariko se, aho gushyirwa mu rungano rw’abanditsi bashya bashyigikirwa, byaragaragaye ko hari igice cy’abakoresha imbuga nkoranyambaga batishimiye icyo gikorwa.
Ku rubuga rwa X (rwahoze ari Twitter), abantu batandukanye bagaragaje ibitekerezo bikomeye, bamwe bamushima abandi bamwibasira. Umwe mu batanze ibitekerezo, witwa Singombwa, yanditse ati: “Koko wamenya wandika iki?”, nk’aho ashaka kumusuzugura no kumwambura ubushobozi bwo kuba umwanditsi.
Undi witwa Hon. Kayitesi we, mu magambo akomeye, yagize ati: “Umuntu watsinzwe icya Leta ntiyakwandika igitabo ngo ngisome”, amagambo yakomeje kuzamura impaka nyinshi hagati y’abamushyigikiye n’abamunenga.
Hari abibajije impamvu umuntu yagombye kumenyekana cyangwa kuguma mu ruhando rwa rubanda ashingiye ku gikorwa cyo kwandika igitabo, mu gihe hari abandi bavuze ko kuba Nyampinga ntibivuze ko umuntu adafite uburenganzira bwo gusangiza abandi inkuru ye. Abamushyigikiye bavuga ko igitabo cye ari uburyo bwo gutanga icyizere, gukomeza guharanira inzozi, no kwigisha abakiri bato kudacika intege.
Ibi byabaye isomo rishya ku buryo abahanzi, abanditsi, n’abandi bantu bamenyekanye bashobora kwakirwa ku mbuga nkoranyambaga aho ishema n’ibitutsi bijya byegerana, kandi buri wese agahabwa urubuga rwo kuvuga icyo atekereza.
