Mu gihe ibihugu byinshi ku I si bikomeje gushakisha ibisubizo by’ibibazo bibangamiye iterambere ryabyo, u Rwanda rukomeje kugaragara nk’icyitegererezo cyiza ku bijyanye n’udushya n’imiyoborere igamije impinduka nziza. Kuva mu mwaka wa 2018 kugeza ubu, abantu bagera ku 9,790 baturutse mu bihugu bitandukanye bamaze gusura u Rwanda baje kwigira ku bisubizo byihariye rwishatsemo, kugira ngo na bo bajye kubishyira mu bikorwa mu mishinga iteza imbere ibihugu byabo.
Aya makuru yatangajwe n’Urwego rw’u Rwanda rushinzwe kumenyekanisha udushya n’ibisubizo byarwo ku rwego mpuzamahanga, Rwanda Cooperation Initiative (RCI). Uru rwego rufite inshingano zo gusangiza amahanga uburyo u Rwanda rwabashije gukemura ibibazo bitandukanye binyuze mu bitekerezo bishya n’imishinga igamije iterambere rirambye.
Abasura u Rwanda banyura muri gahunda zitandukanye zirimo gusura imishinga y’iterambere, guhura n’inzobere ndetse no kuganira n’abayobozi b’inzego zitandukanye. Ibi bibafasha gusobanukirwa neza uko u Rwanda rwashyize mu bikorwa ibisubizo byarwo mu nzego zirimo ubuzima, ikoranabuhanga, uburezi, ubuhinzi n’imiyoborere.
Bamwe mu basuye u Rwanda batangaza ko bishimira uburyo igihugu cyabashije kwiyubaka mu gihe gito nyuma y’amateka akomeye cyanyuzemo, bakemeza ko amasomo bakuye mu Rwanda azabafasha gushyira mu bikorwa imishinga igamije kuzamura imibereho y’abaturage mu bihugu byabo.
Abasesenguzi bemeza ko gukomeza gusangiza amahanga ubunararibonye u Rwanda rufite ari imwe mu nzira zifasha guteza imbere ubufatanye mpuzamahanga, ndetse bigakomeza kurugaragaza nk’igihugu gifite ibisubizo bishya bishobora gufasha Isi muri rusange.
