Umuhanzi Yampano yatawe muri yombi, akurikiranyweho ibyaha bitandukanye

Urwego rw’Igihugu rw’Ubugenzacyaha (RIB) rwemeje ko Uworizagwira Florien uzwi cyane mu muziki nka Yampano yatawe muri yombi, aho akurikiranyweho ibyaha bitandukanye birimo gukubita no gukomeretsa ku bushake, gukoresha ibikangisho ndetse no kunywa ibiyobyabwenge.

Nk’uko byemejwe n’Umuvugizi wa RIB, Murangira B. Thierry, uyu muhanzi yatawe muri yombi ku wa 16 Gicurasi 2026 nyuma y’iperereza ryakorwaga ku byaha akekwaho.

Amakuru avuga ko ibi byaha yaba yarabigizemo uruhare mu bihe bitandukanye. Bivugwa kandi ko nyuma yo kumenya ko hari ikirego cyatanzwe kuri we, yaba yarabanje kwihisha no gushakishwa n’inzego zibishinzwe mbere yo kwitaba Ubugenzacyaha.

Kugeza ubu, Yampano afungiye kuri sitasiyo ya RIB ya Kicukiro, mu gihe iperereza rikomeje kugira ngo dosiye ye itunganywe ishyikirizwe Ubushinjacyaha.

Hari kandi andi makuru akomeje kuvugwa ajyanye n’ihohoterwa rikekwa hagati y’uyu muhanzi n’umugore bivugwa ko bakundana, uzwi nka Vava. Mu minsi ishize, uyu mugore yavuze ko yaba yarakorewe ibikorwa by’ihohoterwa birimo gukubitwa, kugongwa ndetse no guterwa ubwoba.

Icyakora, inzego zibishinzwe ziracyakora iperereza kugira ngo hamenyekane ukuri ku birego byose bivugwa muri iyi dosiye.