Mu gihe abaturage ba Espagne bari mu byishimo byo kwizihiza intsinzi y’ikipe y’igihugu yari imaze kwegukana Igikombe cy’Isi cya 2026, umujyi wa Ciudad Rodrigo wegereye Salamanca wahuye n’inkuru y’incamugongo nyuma y’impanuka yahitanye umwana w’umuhungu w’imyaka 13.
Iyi mpanuka yabaye mu ijoro ryakurikiye umukino wa nyuma, ubwo Espagne yari imaze gutsinda Argentine ikegukana igikombe cy’Isi ku nshuro ya kabiri mu mateka yayo. Mu gihe abaturage bari bakomeje gusohoka mu mihanda bishimira iyo ntsinzi, abantu benshi cyane cyane urubyiruko bari bazamutse ku nyubako y’isoko y’amazi kugira ngo babone neza ibirori byari biri kubera muri uwo mujyi.
Amakuru yatangajwe n’inzego zibishinzwe agaragaza ko iyo nyubako itashoboye kwihanganira uburemere bw’abari bayiriho, bityo igice cyayo kirasenyuka. Uwo mwana w’imyaka 13 yahise agwirwa n’ibice by’iyo nyubako, mu gihe abandi bantu babiri na bo bakomerekaga.
Abatabazi, polisi n’abaganga bahise bagera aho impanuka yabereye, bakora ibishoboka byose kugira ngo bakure uwo mwana munsi y’ibisigazwa by’inyubako ndetse bamuhe ubutabazi bwihuse. Icyakora, nyuma y’igihe gito, yaje kwitaba Imana azize ibikomere bikomeye yari yagize.
Nubwo intsinzi y’ikipe y’igihugu ya Espagne yakomeje kwizihizwa hirya no hino mu gihugu, aho abaturage bazengurukaga imihanda bavuza amahoni, baririmba ndetse bacana ibishashi, muri Ciudad Rodrigo ibyishimo byahise bihinduka ikiriyo. Uru rupfu rw’uwo mwana rwababaje benshi, rutuma umunsi wagombaga kuba uw’ibyishimo usiga abaturage b’uyu mujyi mu gahinda gakomeye, banihanganisha umuryango wabuze umwana wabo.
