Ikipe ya Chelsea FC yatangaje ubufatanye bushya n’ikigo Roc Nation cy’umuraperi w’icyamamare Jay-Z, mu masezerano agamije kongera ubwamamare bw’iyi kipe muri Leta Zunze Ubumwe za Amerika.
Aya masezerano azibanda cyane ku gukoresha imyidagaduro, umuziki ndetse n’umuco wa Hip Hop mu kwegera urubyiruko rwo muri Amerika rukunda siporo n’imyidagaduro icyarimwe. Chelsea ishaka gukomeza kwagura umubare w’abafana bayo muri icyo gihugu, aho umupira w’amaguru ukomeje kugenda ukura umunsi ku wundi.
Roc Nation izafasha Chelsea mu bikorwa byo kwamamaza, gutegura ibitaramo n’ibikorwa by’imyidagaduro bijyana n’imikino yayo, ndetse no gukorana n’ibyamamare bifite izina rikomeye muri Amerika kugira ngo iyi kipe irusheho kwegera abakunzi bayo bashya.
Ubuyobozi bwa Chelsea buvuga ko ubu bufatanye buzafasha iyi kipe kuba hafi y’umuco n’imibereho y’urubyiruko rwo muri Amerika, aho siporo n’umuziki bikunze kugendana cyane. Ni mu gihe Roc Nation nayo ibona aya masezerano nk’uburyo bwo guhuza isi y’umuziki n’iy’umupira w’amaguru ku rwego mpuzamahanga.
Chelsea ikomeje gushora imari mu bikorwa byo kwamamaza izina ryayo ku isoko mpuzamahanga, cyane cyane muri Amerika, igihugu gifite abafana benshi b’imikino n’imyidagaduro ku Isi.
