Umuhanzi w’icyamamare muri Nigeria, Davido, yongeye kwerekana ubuhanga n’ubwamamare afite ku mugabane wa Afurika, nyuma yo gutaramira imbaga y’abantu barenga ibihumbi 35 mu gitaramo gikomeye cyabereye i Lusaka muri Zambia.
Iki gitaramo cyabereye kuri Polo Field Showground, kikaba cyari igice cya nyuma cy’urugendo rwe rw’ibitaramo yise “5ive Alive Tour Africa 2026,” rwazengurutse ibihugu bitandukanye byo kuri uyu mugabane.
Abafana bari bitabiriye ku bwinshi, bagaragaje ibyishimo bidasanzwe ubwo Davido yinjiraga ku rubyiniro yambaye imyambaro irimo ibimenyetso by’umuco n’ubwami bwa Afurika, ibintu byashimishije benshi ndetse bikongera ubusabane hagati ye n’abamukunda.
Muri iki gitaramo, yaririmbye zimwe mu ndirimbo ze zakunzwe cyane, bituma imbaga iririmbana na we mu buryo bugaragaza uburyo umuziki we umaze kugera kure. By’umwihariko, uko yakoranye n’abafana byatumye igitaramo kiba nk’ikirori cy’amateka kuri benshi bari bakitabiriye.
Iki gitaramo cyabaye nk’isonga ry’urugendo rwe muri Afurika, aho yari amaze iminsi anyura mu mijyi itandukanye irimo na Kigali, aho na ho yakiriwe neza n’abakunzi b’umuziki.
“5ive Alive Tour Africa 2026” isize isura nshya ku muziki wa Afurika, aho Davido akomeje kugaragaza ko ari umwe mu bahanzi bafite ijambo rikomeye ku rwego mpuzamahanga.
