Urugamba rwo kwegukana Urukweto rwa Zahabu ruhabwa umukinnyi utsinze ibitego byinshi mu Gikombe cy’Isi rugeze ahakomeye mbere y’umukino wa nyuma uzahuza Argentine na Espagne. Kylian Mbappé ni we uyoboye uru rutonde nyuma yo gutsinda ibitego bibiri mu mukino u Bufaransa bwatsinzwemo n’u Bwongereza ibitego 6-4 mu guhatanira umwanya wa gatatu.
Ibyo bitego byatumye Mbappé ageza ku bitego 10 muri iri rushanwa ndetse ashyiraho agahigo ko gutsinda ibitego byinshi mu Gikombe cy’Isi cyabaye muri iki kinyejana. Yanahise ageza ku bitego 22 mu mateka y’iri rushanwa, arusha Lionel Messi igitego kimwe.
Messi, ufite umukino wa nyuma usigaye, aracyafite amahirwe yo kwisubiza umwanya wa mbere. Aramutse atsinze ibitego bibiri, ashobora kwegukana Urukweto rwa Zahabu kuko ari mu bakinnyi batanze imipira myinshi yavuyemo ibitego kurusha Mbappé.
Mu gihe Messi atabigeraho, Mbappé azaba abaye umukinnyi wa mbere wegukanye Urukweto rwa Zahabu inshuro ebyiri mu Gikombe cy’Isi.
Ku rundi ruhande, Jude Bellingham yazamuye umubare w’ibitego bye agera kuri birindwi nyuma yo gutsinda igitego kimwe mu mukino wahuje u Bwongereza n’u Bufaransa, aba ari we Mwongereza watsinze ibitego byinshi mu irushanwa rimwe ry’Igikombe cy’Isi.
Michael Olise na we yanditse amateka, nyuma yo gutanga umupira wa karindwi wavuyemo igitego, akuraho agahigo ka Pelé kari kamaze imyaka 56, wari waratanze imipira itandatu ivamo ibitego mu irushanwa ry’Igikombe cy’Isi.
