Mu gihe u Rwanda rukomeje guhangana n’ikibazo cy’uko ibyo rwohereza mu mahanga bikiri bike ugereranyije n’ibyo rutumizayo, u Bushinwa bwatangaje ko bwiteguye gukomeza kurufasha mu kongera umusaruro w’ubuhinzi no kuwugeza ku rwego mpuzamahanga. Ibi byagarutsweho na Gao Wenqi, Ambasaderi w’u Bushinwa mu Rwanda, wagaragaje ko ubufatanye hagati y’ibihugu byombi bukomeje gutanga icyizere ku iterambere ry’ubuhinzi.
Yavuze ko u Bushinwa bufite ubunararibonye mu guhindura ubuhinzi bukava ku rwego rwo kwihaza gusa bukagera ku rwego rwo koherezwa ku masoko mpuzamahanga, bityo bukaba bwiteguye gusangira u Rwanda ubwo bumenyi. Yongeyeho ko hazibandwa cyane ku kongera umusaruro, kunoza uburyo bwo kuhira imyaka, gukoresha ikoranabuhanga rigezweho no kongera agaciro ku bihingwa.
Ambasaderi Gao Wenqi yasobanuye ko imwe mu ntego nyamukuru ari ugufasha abahinzi b’u Rwanda kubona amasoko mpuzamahanga, cyane cyane ku bihingwa bifite amahirwe yo kwinjiza amadovize menshi nk’icyayi, ikawa n’imboga n’imbuto. Ibi ngo bizajyana no kubaka ubushobozi bw’abahinzi, haba mu mahugurwa no mu kubaha ibikoresho bikenewe.
Uretse ubuhinzi, u Bushinwa bwanijeje gukomeza gushora imari mu mishinga itandukanye y’iterambere mu Rwanda, irimo ibikorwa remezo n’inganda zitunganya umusaruro ukomoka ku buhinzi. Ibi bikaba bigamije gufasha u Rwanda kugabanya icyuho kiri hagati y’ibitumizwa n’ibyoherezwa mu mahanga.
Iyi gahunda yitezweho kuzamura ubukungu bw’u Rwanda no guteza imbere imibereho y’abaturage benshi bishingikiriza ku buhinzi. Abasesenguzi bavuga ko ubufatanye nk’ubu bushobora gutuma u Rwanda rwinjira ku rwego rushya mu bucuruzi mpuzamahanga, cyane cyane mu kongera ibyoherezwa mu mahanga bikomoka ku buhinzi.
